ହାଇକୋର୍ଟଗୁଡ଼ିକ ପାଇଁ କଡ଼ା ଡେଡ୍ ଲାଇନ୍ ରଖିଲେ ସୁପ୍ରିମକୋର୍ଟ!

ହାଇକୋର୍ଟଗୁଡ଼ିକ ପାଇଁ କଡ଼ା ଡେଡ୍ ଲାଇନ୍ ରଖିଲେ ସୁପ୍ରିମକୋର୍ଟ! । ଦେଶର ନ୍ୟାୟିକ ବ୍ୟବସ୍ଥାରେ ଏକ ବଡ଼ ଧରଣର ସଂସ୍କାର ଆଣିବା ସହ ସାଧାରଣ ଜନତାଙ୍କ ବ୍ୟକ୍ତିଗତ ସ୍ୱାଧୀନତାକୁ ସୁରକ୍ଷା ଦେବା ପାଇଁ ସୁପ୍ରିମକୋର୍ଟଙ୍କ ସ୍ମରଣୀୟ ଏବଂ ଐତିହାସିକ ନିର୍ଦ୍ଦେଶ । ସର୍ବୋଚ୍ଚ ଅଦାଲତ ସ୍ପଷ୍ଟ କରିଛନ୍ତି ଯେ, ଏଣିକି ଦେଶର ସମସ୍ତ ହାଇକୋର୍ଟ କୌଣସି ମାମଲାର ଶୁଣାଣି ଶେଷ କରିବା ପରେ ତାର ଚୂଡ଼ାନ୍ତ ରାୟ ବା ଜଜ୍ ମେଣ୍ଟକୁ ୩ ମାସ ମଧ୍ୟରେ ପ୍ରକାଶ କରିବେ । ସେହିପରି ଜାମିନ ଆବେଦନ ଉପରେ ସେହି ଦିନ କିମ୍ବା ତା ପରଦିନ ମଧ୍ୟରେ ଆଦେଶ ଶୁଣାଇବାକୁ ହେବ । ଜାମିନ ମିଳିବା ମାତ୍ରେ ହିଁ ବିଚାରାଧୀନ କଏଦୀଙ୍କୁ ଜେଲ୍ ରୁ ମୁକ୍ତ କରାଯିବ। ମୁଖ୍ୟ ବିଚାରପତି ସୂର୍ଯ୍ୟକାନ୍ତ ଏବଂ ବିଚାରପତି ଜୟମାଲ୍ୟ ବାଗଚୀଙ୍କୁ ନେଇ ଗଠିତ ଏକ ଖଣ୍ଡପୀଠ ସମ୍ବିଧାନର ଧାରା ୧୪୨ ଅନୁଯାୟୀ ଏହି ବାଧ୍ୟତାମୂଳକ ଗାଇଡ୍ ଲାଇନ୍ ଜାରି କରିଛନ୍ତି । ଝାଡ଼ଖଣ୍ଡର ଏକ ମାମଲାର ଶୁଣାଣି ବେଳେ, ୨୦୨୨ ମସିହାରୁ ଅନେକ ଆବେଦନ ପେଣ୍ଡିଂ ରହିଥିଲା, ସେହି ପ୍ରସଙ୍ଗକୁ ଗମ୍ଭୀରତାର ସହ ନେଇ କୋର୍ଟ ଏହି ନିର୍ଦ୍ଦେଶ ଦେଇଛନ୍ତି । ହାଇକୋର୍ଟ କୌଣସି ରାୟ ସଂରକ୍ଷିତ ରଖିବାର ୩ ମାସ ମଧ୍ୟରେ ତାହା ପ୍ରକାଶ କରିବେ । ଯଦି ଏଥିରେ ବିଳମ୍ବ ହୁଏ, ତେବେ ରେଜିଷ୍ଟ୍ରାର ଜେନେରାଲ ଏହି ମାମଲାକୁ ହାଇକୋର୍ଟର ମୁଖ୍ୟ ବିଚାରପତିଙ୍କ ସାମ୍ନାରେ ରଖିବେ । ମୁଖ୍ୟ ବିଚାରପତି ୨ ସପ୍ତାହ ମଧ୍ୟରେ ରାୟ ପ୍ରକାଶ କରିବା ସୁନିଶ୍ଚିତ କରିବେ କିମ୍ବା ସେହି ମାମଲାକୁ ଅନ୍ୟ କୌଣସି ବେଞ୍ଚ୍ କୁ ହସ୍ତାନ୍ତର କରିବେ।

ନୂଆ ଜାମିନ ଆବେଦନଗୁଡ଼ିକୁ ତୁରନ୍ତ ତାଲିକାଭୁକ୍ତ କରାଯିବ ଏବଂ ଶୁଣାଣିର ସେହି ଦିନ କିମ୍ବା ତାର ପରଦିନ ହିଁ ଜାମିନ ନିର୍ଦ୍ଦେଶ ପ୍ରକାଶ କରାଯିବ। ଜାମିନ ମିଳିଥିବା ବିଚାରାଧୀନ କଏଦୀମାନଙ୍କୁ ସେହି ଦିନ କିମ୍ବା ସର୍ବାଧିକ ତାର ପରବର୍ତ୍ତୀ କାର୍ଯ୍ୟଦିବସ ମଧ୍ୟରେ ଜେଲ୍ ରୁ ମୁକ୍ତ କରିବାକୁ ହେବ। ଏଥିପାଇଁ ହାଇକୋର୍ଟଙ୍କ ୱେବସାଇଟ୍ ରେ ତୁରନ୍ତ ଆଦେଶ କପି ଅପଲୋଡ୍ କରିବା ବାଧ୍ୟତାମୂଳକ । ବିଳମ୍ବ ହେଉଥିବା ମାମଲାଗୁଡ଼ିକ ଉପରେ ନଜର ରଖିବା ଏବଂ ସମୟସୀମା ଉଲ୍ଲଂଘନ ହେଲେ ମାମଲାର ପୁନଃ ବଣ୍ଟନ ପାଇଁ ପ୍ରତି ହାଇକୋର୍ଟରେ ଏକ ମନିଟରିଂ ବ୍ୟବସ୍ଥା ରହିବ । ଜେଲ୍ ନୁହେଁ, ଜାମିନ ହିଁ ନିୟମ । ସର୍ବୋଚ୍ଚ ଅଦାଲତ ଜୋର୍ ଦେଇ କହିଛନ୍ତି ଯେ, ରାୟ ପ୍ରକାଶ କରିବାରେ ବର୍ଷ ବର୍ଷ ଧରି ବିଳମ୍ବ ହେବା ସମ୍ବିଧାନର ଧାରା ୨୧ ଅନୁଯାୟୀ ନାଗରିକଙ୍କ ବ୍ୟକ୍ତିଗତ ସ୍ୱାଧୀନତାର ମୌଳିକ ଅଧିକାରକୁ କ୍ଷୁଣ୍ଣ କରୁଛି ।

କୋର୍ଟ କହିଛନ୍ତି, “ଯେତେବେଳେ ବ୍ୟକ୍ତିଗତ ସ୍ୱାଧୀନତାର କଥା ଆସେ, ଜାମିନ ଅପେକ୍ଷା ଅନ୍ୟ କିଛି ବି ଗୁରୁତ୍ୱପୂର୍ଣ୍ଣ ନୁହେଁ । ‘ଜାମିନ ହେଉଛି ନିୟମ ଏବଂ ଜେଲ୍ ହେଉଛି ବ୍ୟତିକ୍ରମ’ । ଦେଶର ବିଭିନ୍ନ ଜେଲ୍ ରେ ହଜାର ହଜାର ବିଚାରାଧୀନ କଏଦୀ କେବଳ ନ୍ୟାୟିକ ପ୍ରକ୍ରିୟାରେ ବିଳମ୍ବ ଯୋଗୁଁ ବର୍ଷ ବର୍ଷ ଧରି ସଢ଼ୁଛନ୍ତି । ସୁପ୍ରିମକୋର୍ଟଙ୍କ ଏହି ନୂଆ ଗାଇଡ୍ ଲାଇନ୍ ଫଳରେ ହାଇକୋର୍ଟଗୁଡ଼ିକରେ ମାମଲା ଗୁଡ଼ିକର ଶୀଘ୍ର ସମାଧାନ ହୋଇପାରିବ। ବିଚାରାଧୀନ କଏଦୀମାନଙ୍କୁ ଜେଲ୍ ରେ ଅନାବଶ୍ୟକ ଭାବେ ରହିବାକୁ ପଡ଼ିବ ନାହିଁ । କୋର୍ଟ ପ୍ରଶାସନ ମଧ୍ୟରେ ଅଧିକ ସ୍ୱଚ୍ଛତା ଓ ଦାୟିତ୍ୱବୋଧ ଆସିବ।