ରାଞ୍ଚିରେ ମିଳିଥିବା ପରାଜୟର ଜବାବ ଇନ୍ଦୋରରେ ଦେଇଛି ଟିମ୍ ଇଣ୍ଡିଆ

ରାଞ୍ଚିରେ ମିଳିଥିବା ପରାଜୟର ଜବାବ ଇନ୍ଦୋରରେ ଦେଇଛି ଟିମ୍ ଇଣ୍ଡିଆ। ତୃତୀୟ ଟି-୨୦ ମ୍ୟାଚ୍ରେ ୱେଷ୍ଟଇଣ୍ଡିଜକୁ ୧୪ ରନରେ ପରାସ୍ତ କରିଛି ଭାରତ। ଏହି ବିଜୟ ସହ ୫ ମ୍ୟାଚ୍ ବିଶିଷ୍ଟ ସିରିଜରେ ଭାରତ ୨-୧ରେ ଆଗୁଆ ହୋଇଛି। ପ୍ରଥମେ ବ୍ୟାଟିଂ କରି ଭାରତ ୨୨୩ ରନ୍ କରିଥିବାବେଳେ ଜବାବରେ ୱେଷ୍ଟଇଣ୍ଡିଜ୍ ୨୦ ଓଭରରେ ୨୦୯ ରନ୍ କରିପାରିଥିଲା। ଏଥର ଭାରତୀୟ ବୋଲରମାନେ ରାଞ୍ଚିର ଭୁଲକୁ ଦୋହରାଇ ନଥିଲେ। ଆରମ୍ଭରୁ କାରିବିଆନ୍ ବ୍ୟାଟରଙ୍କ ଉପରେ ଚାପ ସୃଷ୍ଟି କରି ରନ୍ ଗତିକୁ ନିୟନ୍ତ୍ରଣରେ ରଖିଥିଲେ। ନମନ ଧୀର ଓ ଅର୍ଶଦୀପ ସିଂହଙ୍କୁ ଛାଡ଼ିଦେଲେ ଅନ୍ୟ ବୋଲରମାନଙ୍କ ଆଶାନୁରୁପ ପ୍ରଦର୍ଶନ ଦେଖିବାକୁ ମିଳିନଥିଲା।

୨୨୩ ରନର ଟାର୍ଗେଟ୍, ଜିତିପାରିଲାନି ୱେଷ୍ଟଇଣ୍ଡିଜ୍:

ତୃତୀୟ ଟି-୨୦ରେ ଟସ୍ ଜିତି ୱେଷ୍ଟଇଣ୍ଡିଜ୍ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଦଳ ଆଶା କରିଥିଲା ଯେ ରାଞ୍ଚି ମ୍ୟାଚ୍ ଭଳି ଇନ୍ଦୋରରେ ମଧ୍ୟ କାକରର ପ୍ରଭାବ ଭାରତୀୟ ବୋଲରଙ୍କୁ ଅସୁବିଧାରେ ପକାଇବ। କାକର ପଡ଼ିଥିଲେ ମଧ୍ୟ ଏହାର ପ୍ରଭାବ ଆଶା ଅନୁସାରେ ଅଧିକ ନଥିଲା। ପ୍ରଥମେ ବ୍ୟାଟିଂ କରି ଭାରତ ୨୨୩ ରନର ବଡ଼ ସ୍କୋର୍ କରିଥିଲା। ଏହାର ଜବାବରେ ୱେଷ୍ଟଇଣ୍ଡିଜର ବ୍ୟାଟରମାନେ ଚେଷ୍ଟା କରିଥିଲେ ମଧ୍ୟ ଆବଶ୍ୟକ ରନ୍ ଗତି ବଜାୟ ରଖିପାରିନଥିଲେ। ଶେଷରେ ଦଳ ୨୦୯ ରନରେ ସୀମିତ ରହିଥିଲା।

ଶାଇ ହୋପଙ୍କୁ ଶୀଘ୍ର ଆଉଟ୍ କଲେ ଅର୍ଶଦୀପ:

ରାଞ୍ଚିରେ ଶତକୀୟ ଇନିଂସ ଖେଳିଥିବା ୱେଷ୍ଟଇଣ୍ଡିଜ୍ ଅଧିନାୟକ ଶାଇ ହୋପଙ୍କଠାରୁ ଦଳ ଏଥର ମଧ୍ୟ ବଡ଼ ଇନିଂସ ଆଶା କରିଥିଲା। କିନ୍ତୁ ଅର୍ଶଦୀପ ସିଂହ ତାଙ୍କୁ ଶୀଘ୍ର ଆଉଟ୍ କରି ଭାରତକୁ ଗୁରୁତ୍ୱପୂର୍ଣ୍ଣ ସଫଳତା ଦେଇଥିଲେ। ଏହାପରେ ଶିମ୍ରନ୍ ହେଟମାୟର ଓ କାମିଲ୍ ପୁରନ୍ ବ୍ୟାଟିଂ କରୁଥିବା ସମୟରେ ୱେଷ୍ଟଇଣ୍ଡିଜର ବିଜୟ ଆଶା ରହିଥିଲା। କିନ୍ତୁ ୮୨ ରନ୍ ସ୍କୋରରେ ପାୱେଲ୍ ଆଉଟ୍ ହେବା ପରେ ଦଳର ରନ୍ ଗତି ପ୍ରଭାବିତ ହୋଇଥିଲା। ପରବର୍ତ୍ତୀ ବ୍ୟାଟରମାନେ ବଡ଼ ଭାଗୀଦାରି ଗଢ଼ିବାରେ ବିଫଳ ହୋଇଥିଲେ।

ଶେଷ ଓଭରରେ ଶମାର ସ୍ପ୍ରିଙ୍ଗରଙ୍କ ଝଡ଼:

ମ୍ୟାଚର ଶେଷ ଆଡ଼କୁ ଶମର ସ୍ପ୍ରିଙ୍ଗର ଦ୍ରୁତ ବ୍ୟାଟିଂ କରି ଭାରତୀୟ ବୋଲରଙ୍କୁ ଚାପରେ ପକାଇଥିଲେ। ସେ ମାତ୍ର ୧୧ଟି ବଲରେ ୩୫ ରନ୍ କରିଥିଲେ, ଯେଉଁଥିରେ ୪ଟି ଛକା ସାମିଲ ଥିଲା। ତାଙ୍କର ଏହି ଆକ୍ରମଣାତ୍ମକ ବ୍ୟାଟିଂ ୱେଷ୍ଟଇଣ୍ଡିଜର ପରାଜୟ ବ୍ୟବଧାନକୁ କମାଇଥିଲା। କିନ୍ତୁ ଦଳକୁ ବିଜୟୀ କରିବା ପାଇଁ ଏହା ଯଥେଷ୍ଟ ହୋଇନଥିଲା। ଭାରତୀୟ ବୋଲରମାନେ ଶେଷ ପର୍ଯ୍ୟନ୍ତ ନିୟନ୍ତ୍ରଣ ବଜାୟ ରଖି ୧୪ ରନର ବିଜୟ ହାସଲ କରିଥିଲେ। ଏହି ବିଜୟ ସହ ଭାରତ ସିରିଜରେ ୨-୧ରେ ଆଗୁଆ ହୋଇଛି। ରାଞ୍ଚିରେ ହୋଇଥିବା ପରାଜୟ ପରେ ଇନ୍ଦୋରରେ ଦଳର ପ୍ରତ୍ୟାବର୍ତ୍ତନ ଭାରତୀୟ ପ୍ରଶଂସକଙ୍କ ପାଇଁ ଆଶ୍ୱସ୍ତି ଆଣିଛି।