ଓଡ଼ିଶା ଝାଡ଼ଖଣ୍ଡ ସୀମାନ୍ତ ସରଣ୍ଡା ଜଙ୍ଗଲରେ ଏନକାଉଣ୍ଟର

ଓଡ଼ିଶା ଝାଡ଼ଖଣ୍ଡ ସୀମାନ୍ତ ସରଣ୍ଡା ଜଙ୍ଗଲରେ ଏନକାଉଣ୍ଟର । ସୁରକ୍ଷା ବାହିନୀ ଓ ମାଓବାଦୀଙ୍କ ମଧ୍ୟରେ ଗୁଳିବିନିମୟରେ ଜଣେ ହାର୍ଡକୋର ନକ୍ସଲ ମୃତ । ମୃତ ମାଓବଦୀ ଇସ୍ରାଏଲ ପୂରତି ଓରଫ୍ ଅମ୍ରିତ ମୁଣ୍ଡରେ ଏକ ଲକ୍ଷ ଟଙ୍କାର ପୁରସ୍କାର ଥିଲା । ମୃତଦେହ ନିକଟରୁ ଗୋଟିଏ SLR ରାଇଫଲ ସହ ବିସ୍ଫୋରକ ସାମଗ୍ରୀ ଜବତ କରିଛି ସୁରକ୍ଷା ବାହିନୀ । ପଶ୍ଚିମ ସିଂହଭୂମ ଜିଲ୍ଲା ଟଣ୍ଟୋ ଓ ଗୋଏଲକେରା ଥାନା ଅଞ୍ଚଳରେ ହାର୍ଡକୋର ମାଓବାଦୀ ମିଶିର ବେଶ୍ରା ଓ ତାର ଟିମ୍ ଥିବା ଖବର ପାଇଥିଲା ସୁରକ୍ଷା ବାହିନୀ ।

ଏହା ପରେ ସରଣ୍ଡା ଜଙ୍ଗଲରେ ଜୋରଦାର ହୋଇଥିଲା ସର୍ଚ୍ଚ ଅପରେସନ। ସେଣ୍ଟ୍ରାଲ କମିଟିର ଶେଷ ସଦସ୍ୟ ମିଶିର ବେଶ୍ରା ଓ ତା ଟିମକୁ ଶେଷ କରିବାକୁ ୨୦୯ସିଆରପିଏଫ୍ କୋବ୍ରା ବାଟାଲିୟନ, ଝାଡ଼ଖଣ୍ଡ ଜାଗୁଆର୍ ଓ ସ୍ଥାନୀୟ ପୋଲିସ ପକ୍ଷରୁ ମିଳିତ ଭାବେ ସର୍ଚ୍ଚ ଅପରେସନ ଆରମ୍ଭ ହୋଇଥିଲା । ଗୁଳିବିନିମୟ ବେଳେ ସୁରକ୍ଷାକର୍ମୀଙ୍କ ଗୁଳିରେ ଇସ୍ରାଏଲ ପୂରତି ନିହତ ହୋଇଥିଲା । ମିଶିର ବେଶ୍ରାକୁ ଧରିବାକୁ ସର୍ଚ୍ଚ ଅପରେସନ କୁ ଜୋରଦାର କରାଯାଇଛି। ବର୍ତ୍ତମାନ ସୁଦ୍ଧା ସେହି ଅଞ୍ଚଳରେ ସୁରକ୍ଷା ବାହିନୀ ଓ ନକ୍ସଲଙ୍କ ମଧ୍ୟରେ ଗୁଳିବିନିମୟ ଚାଲିଥିବା ସୂଚନା ମିଳିଛି।