କନସଲ୍ଟିଂରୁ ଟେକ୍: ବିଜିୟୁର ଛାତ୍ରଛାତ୍ରୀ ହାସଲ କଲେ ଆକର୍ଷଣୀୟ ପ୍ଲେସମେଣ୍ଟ
ଭୁବନେଶ୍ୱର: ବିର୍ଲା ଗ୍ଲୋବାଲ ୟୁନିଭର୍ସିଟି (ବିଜିୟୁ) ଚଳିତ ବର୍ଷର କ୍ୟାମ୍ପସ ପ୍ଲେସମେଣ୍ଟ ଡ୍ରାଇଭରେ ଏକ ବଡ଼ ସଫଳତା ହାସଲ କରିଛି। ଏହି ନିଯୁକ୍ତି ମେଳାରେ ୨୦ରୁ ଅଧିକ ବିଭିନ୍ନ କ୍ଷେତ୍ରର ପ୍ରତିଷ୍ଠିତ କମ୍ପାନୀ ଅଂଶଗ୍ରହଣ କରିଥିବା ବେଳେ ଛାତ୍ରଛାତ୍ରୀମାନେ ବାର୍ଷିକ ସର୍ବାଧିକ ୧୭ ଲକ୍ଷ ଟଙ୍କାର (ସିଟିସି) ପ୍ୟାକେଜରେ ନିଯୁକ୍ତି ପାଇଛନ୍ତି। ଫେଡେରାଲ ବ୍ୟାଙ୍କ ପକ୍ଷରୁ ଏହି ସର୍ବାଧିକ ପ୍ୟାକେଜ୍ ପ୍ରଦାନ କରାଯାଇଥିବା ବେଳେ ଏର୍ନଷ୍ଟ ଏଣ୍ଡ୍ ୟଙ୍ଗ (ଇୱାଇ) ସର୍ବାଧିକ ୨୮ ଜଣ ଛାତ୍ରଛାତ୍ରୀଙ୍କୁ ଚୟନ କରିଛି। ଏଥିସହ ୟୁକେର ପ୍ରସିଦ୍ଧ ‘ଲୟଡ୍ସ ବ୍ୟାଙ୍କିଂ ଗ୍ରୁପ୍’ର ଅଫସୋର ସେଣ୍ଟର ଏମବିଏ ଏବଂ ଏମ୍.କମ୍ ର ୯ ଜଣ ଛାତ୍ରଛାତ୍ରୀଙ୍କୁ ନିଯୁକ୍ତି ଦେଇ ନିଜର ଶିଳ୍ପ ଆଭିମୁଖ୍ୟ ପ୍ରକାଶ କରିଛି।
ଏହି ପ୍ଲେସମେଣ୍ଟ ଡ୍ରାଇଭରେ କେବଳ ମ୍ୟାନେଜମେଣ୍ଟ ନୁହେଁ, ବରଂ ଆଇନ, ସାମ୍ବାଦିକତା, କମର୍ସ ଏବଂ ଡାଟା ସାଇନ୍ସ ଭଳି ବିଭିନ୍ନ ବିଭାଗର ଛାତ୍ରଛାତ୍ରୀମାନେ ମଧ୍ୟ ଉଲ୍ଲେଖନୀୟ ସଫଳତା ପାଇଛନ୍ତି। ଟିସିଏସ, ଡେଲଏଟ୍ ଏବଂ ଟେକ୍ ମହିନ୍ଦ୍ରା ଭଳି ପ୍ରମୁଖ ଆଇଟି କମ୍ପାନୀଗୁଡ଼ିକ ସଫ୍ଟୱେୟାର ଡେଭଲପମେଣ୍ଟ ଓ ଆନାଲିଟିକ୍ସ ପଦବୀ ପାଇଁ ବହୁ ସଂଖ୍ୟାରେ ନିଯୁକ୍ତି ଦେଇଛନ୍ତି।
ବିଶ୍ୱବିଦ୍ୟାଳୟର ଆଉଟରିଚ୍ ଆଣ୍ଡ ଇଣ୍ଟରନ୍ୟାସନାଲ ଆଫେୟାର୍ସର ଡିନ୍ ଡ. ସତ୍ୟକାମ ମିଶ୍ର ଏହି ସଫଳତା ଉପରେ ମତ ଦେଇ କହିଛନ୍ତି ଯେ, ଏଡିପି ଓ ଲୟଡ୍ସ ଭଳି ବିଶ୍ୱସ୍ତରୀୟ କମ୍ପାନୀଗୁଡ଼ିକର ଆଗମନ ବିଜିୟୁର ଶିଳ୍ପ-ଭିତ୍ତିକ ପାଠ୍ୟକ୍ରମ ପ୍ରତି ସେମାନଙ୍କର ଅଗାଧ ବିଶ୍ୱାସକୁ ଦର୍ଶାଉଛି। ଏହି ଉଲ୍ଲେଖନୀୟ ଉପଲବ୍ଧି ୟୁନିଭର୍ସିଟିର ଉନ୍ନତ ତାଲିମ, ବ୍ୟବହାରିକ ଶିକ୍ଷା ଏବଂ ଛାତ୍ରଛାତ୍ରୀଙ୍କୁ ଭବିଷ୍ୟତର ଦକ୍ଷ ନେତୃତ୍ୱ ଭାବେ ଗଢ଼ିବାର ପ୍ରତିବଦ୍ଧତାକୁ ପୁଣି ଥରେ ପ୍ରମାଣିତ କରିଛି।
