Business

ବାଲିଯାତ୍ରା ପାଇଁ ଟିପିସିଓଡିଏଲ୍‌ର ବ୍ୟାପକ ପ୍ରସ୍ତୁତି: ସୁଦୃଢ଼ ବିଦ୍ୟୁତ୍ ଭିତ୍ତିଭୂମି ଓ ସୁରକ୍ଷା ବ୍ୟବସ୍ଥାକୁ ଗୁରୁତ୍ଵ

ନଭେମ୍ବର ୧୭, ୨୦୨୬: ଚଳିତ ବର୍ଷ ଐତିହାସିକ କଟକ ବାଲିଯାତ୍ରାରେ ଏକ କୋଟିରୁ ଅଧିକ ଲୋକଙ୍କ ସମାଗମ ହେବାର ଆଶା କରାଯାଉଥିବା ବେଳେ, ଟାଟା ପାୱାର ଏବଂ ଓଡ଼ିଶା ସରକାରଙ୍କ ଏକ ଯୌଥ ଉଦ୍ୟୋଗ ଟିପି ସେଣ୍ଟ୍ରାଲ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ୍ (ଟିପିସିଓଡିଏଲ୍) ପକ୍ଷରୁ ସମଗ୍ର ମେଳା ପଡ଼ିଆରେ ନିରାପଦ, ଭରସାଯୋଗ୍ୟ ଏବଂ ନିରବଚ୍ଛିନ୍ନ ବିଦ୍ୟୁତ୍ ଯୋଗାଣ ସୁନିଶ୍ଚିତ କରିବା ପାଇଁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି।

କାର୍ତ୍ତିକ ପୂର୍ଣ୍ଣିମା ଅବସରରେ ମହାନଦୀ କୂଳରେ ପାଳିତ ହେଉଥିବା ବାଲିଯାତ୍ରା ପ୍ରାଚୀନ କଳିଙ୍ଗର ସାଧବ ପୁଅମାନଙ୍କର ସାମୁଦ୍ରିକ ଐତିହ୍ୟକୁ ମନେ ପକାଇଥାଏ, ଯେଉଁମାନେ ବାଲି ତଥା ଦକ୍ଷିଣ-ପୂର୍ବ ଏସିଆର ଅନ୍ୟାନ୍ୟ ଅଞ୍ଚଳକୁ ସମୁଦ୍ର ପଥରେ ବାଣିଜ୍ୟ ଯାତ୍ରା କରୁଥିଲେ। ବର୍ଷ ବର୍ଷ ଧରି ଏହି ଉତ୍ସବ ଏସିଆର ଅନ୍ୟତମ ବୃହତ୍ତମ ବାଣିଜ୍ୟ ମେଳାରେ ପରିଣତ ହୋଇଛି, ଯାହା ଓଡ଼ିଶାର ସମୃଦ୍ଧ ସାଂସ୍କୃତିକ ଐତିହ୍ୟକୁ ପ୍ରଦର୍ଶିତ କରିବା ସହ ବ୍ୟବସାୟୀ, ଉଦ୍ୟୋଗୀ, କାରିଗର ଏବଂ ଦର୍ଶକମାନଙ୍କୁ ଏକାଠି କରିଥାଏ। ୨୦୨୫ ସଂସ୍କରଣରେ ଏଠାରେ ୮୦ ଲକ୍ଷରୁ ଅଧିକ ଲୋକଙ୍କ ସମାଗମ ହୋଇଥିଲା।

ସମଗ୍ର ଉତ୍ସବ ସମୟରେ ୨୪ ଘଣ୍ଟିଆ ବିଦ୍ୟୁତ୍ ଉପଲବ୍ଧତା ସୁନିଶ୍ଚିତ କରିବା ଉପରେ ଧ୍ୟାନ ଦେଇ ଟିପିସିଓଡିଏଲ୍ ସମ୍ପୂର୍ଣ୍ଣ ୧୪୦ ଏକର ମେଳା ପଡ଼ିଆକୁ ବିଦ୍ୟୁତୀକରଣ କରିବା ପାଇଁ ବ୍ୟାପକ ବ୍ୟବସ୍ଥା କରିଛି। କମ୍ପାନୀ ପକ୍ଷରୁ ଷ୍ଟଲ୍ ମାଲିକମାନଙ୍କ ପାଇଁ ପ୍ରାୟ ୮୦୦ ଅସ୍ଥାୟୀ ବିଦ୍ୟୁତ୍ ସଂଯୋଗର ସୁବିଧା ଯୋଗାଇ ଦିଆଯାଇଛି ଏବଂ ଏଥିପାଇଁ ଆବେଦନ ଓ ସଂଯୋଗ ପ୍ରକ୍ରିୟାକୁ ଅତ୍ୟନ୍ତ ସୁଗମ ଏବଂ ଦକ୍ଷତାର ସହ ସମ୍ପୂର୍ଣ୍ଣ କରାଯାଇଛି।

ପ୍ରାୟ ୪ ମେଗାୱାଟ୍‌ର ଆନୁମାନିକ ସର୍ବାଧିକ ଲୋଡ୍ ଚାହିଦା ପୂରଣ କରିବା ପାଇଁ ଟିପିସିଓଡିଏଲ୍ ପକ୍ଷରୁ ବିଦ୍ୟୁତ୍ ବିତରଣ ଭିତ୍ତିଭୂମିକୁ ସୁଦୃଢ଼ କରାଯାଇଛି, ଯେଉଁଥିରେ ୫୦୦ କେଭିଏ କ୍ଷମତା ବିଶିଷ୍ଟ ୨୨ଟି ଟ୍ରାନ୍ସଫର୍ମର ସ୍ଥାପନ କରାଯାଇଛି। ଭରସାଯୋଗ୍ୟ ବିଦ୍ୟୁତ୍ ବିତରଣ ସୁନିଶ୍ଚିତ କରିବା ପାଇଁ ସମଗ୍ର ମେଳା ପଡ଼ିଆରେ ପ୍ରାୟ ୫୦୦ ବିଦ୍ୟୁତ୍ ଖୁଣ୍ଟ ପୋତାଯାଇଛି। ସୁରକ୍ଷା ବୃଦ୍ଧି କରିବା ଏବଂ ବୈଦ୍ୟୁତିକ ବିପଦର ଆଶଙ୍କା କମାଇବା ପାଇଁ ବାଲିଯାତ୍ରା ପଡ଼ିଆର ସମସ୍ତ ୧୧ କେଭି ଲାଇନ୍‌ରେ ଭୂତଳ କେବୁଲିଂ ବ୍ୟବସ୍ଥା କରାଯାଇଛି। ଅତିରିକ୍ତ ସୁରକ୍ଷା ପଦକ୍ଷେପ ସ୍ୱରୂପ ସବ୍-ଷ୍ଟେସନଗୁଡ଼ିକର ଉପଯୁକ୍ତ ବାଡ଼ବନ୍ଦୀ କରାଯାଇଛି ଏବଂ ଅଧିକ ଜନସମାଗମ ହେଉଥିବା ଅଞ୍ଚଳରେ ବୈଦ୍ୟୁତିକ ବିପଦକୁ ସର୍ବନିମ୍ନ ରଖିବା ପାଇଁ କଣ୍ଡକ୍ଟରଗୁଡ଼ିକୁ ସଂଯୋଗ କରିବାକୁ ଏଲଟିଏବି କେବୁଲ୍ ବ୍ୟବହାର କରାଯାଇଛି।

ବିଦ୍ୟୁତ୍ ଯୋଗାଣ ତଦାରଖ କରିବା, ଭିତ୍ତିଭୂମି ଉପରେ ନଜର ରଖିବା ଏବଂ ପରିଚାଳନାଗତ ଆବଶ୍ୟକତା ଅନୁଯାୟୀ ତୁରନ୍ତ ପଦକ୍ଷେପ ନେବା ପାଇଁ ମେଳା ପରିସରରେ ପ୍ରାୟ ୨୦୦ ଜଣ ଟିପିସିଓଡିଏଲ୍ କର୍ମଚାରୀଙ୍କୁ ନିୟୋଜିତ କରାଯାଇଛି। ଏହାର ଗ୍ରାହକ ସହାୟତା ବ୍ୟବସ୍ଥାକୁ ଅଧିକ ମଜବୁତ କରି, ଅଭିଯୋଗଗୁଡ଼ିକର ସମାଧାନ କରିବା ଏବଂ ବୈଷୟିକ ସମସ୍ୟାଗୁଡ଼ିକୁ ଦକ୍ଷତାର ସହ ଦୂର କରିବା ପାଇଁ କମ୍ପାନୀ ପକ୍ଷରୁ ସମଗ୍ର ମେଳା ପଡ଼ିଆରେ ୧୦ଟି ଫ୍ୟୁଜ୍ କଲ୍ ସେଣ୍ଟର ସ୍ଥାପନ କରାଯାଇଛି।

ଏହି ବ୍ୟବସ୍ଥା ସମ୍ପର୍କରେ ମତ ଦେଇ ଟାଟା ପାୱାରର ଚିଫ୍ ଓଡ଼ିଶା ଡିଷ୍ଟ୍ରିବ୍ୟୁସନ ବିଜନେସ୍ ତଥା ଟିପିସିଓଡିଏଲ୍‌ର ସିଇଓ ଶ୍ରୀ ଗଜାନନ ଏସ୍. କାଲେ କହିଛନ୍ତି ଯେ, “ବାଲିଯାତ୍ରା ହେଉଛି ଓଡ଼ିଶାର ସାଂସ୍କୃତିକ ଏବଂ ବାଣିଜ୍ୟିକ ଐତିହ୍ୟର ଏକ ଐତିହାସିକ ଉତ୍ସବ। ସୁଦୃଢ଼ ଭିତ୍ତିଭୂମି, ସମର୍ପିତ ଦଳ ଏବଂ ତ୍ୱରିତ ସହାୟତା କେନ୍ଦ୍ର ମାଧ୍ୟମରେ ସମଗ୍ର ମେଳା ପଡ଼ିଆରେ ନିରାପଦ ଏବଂ ଭରସାଯୋଗ୍ୟ ବିଦ୍ୟୁତ୍ ଯୋଗାଣ ସୁନିଶ୍ଚିତ କରିବାକୁ ଆମେ ପ୍ରତିବଦ୍ଧ। ଦର୍ଶକ, ବ୍ୟବସାୟୀ ଏବଂ ଉଦ୍ୟୋଗୀମାନଙ୍କ ପାଇଁ ଏକ ସୁଗମ ଅନୁଭୂତି ସୁନିଶ୍ଚିତ କରିବା ହେଉଛି ଆମର ପ୍ରାଥମିକତା।”

ଏହି ବ୍ୟାପକ ବ୍ୟବସ୍ଥା ମାଧ୍ୟମରେ, ଓଡ଼ିଶାର ସାଂସ୍କୃତିକ ଐତିହ୍ୟକୁ ସମର୍ଥନ କରିବା ଏବଂ ରାଜ୍ୟର ଅନ୍ୟତମ ପ୍ରସିଦ୍ଧ ବାର୍ଷିକ ଉତ୍ସବ ସମୟରେ ଭରସାଯୋଗ୍ୟ ବିଦ୍ୟୁତ୍ ସେବା ସୁନିଶ୍ଚିତ କରିବା ପାଇଁ ଟିପିସିଓଡିଏଲ୍ ତାର ପ୍ରତିବଦ୍ଧତାକୁ ଦୋହରାଇଛି।

Share

Leave a Reply

Your email address will not be published. Required fields are marked *

one + 10 =