ଗଞ୍ଜାମରେ ଧନ୍ଦାମୂଳକ ପ୍ରଶିକ୍ଷଣ କେନ୍ଦ୍ର ଉଦ୍ଘାଟନ କଲା ଟିପିଏସ୍ଓଡିଏଲ୍
ବ୍ରହ୍ମପୁର : ମହିଳା ଓ ଯୁବବର୍ଗଙ୍କୁ ବ୍ୟବହାରିକ ଦକ୍ଷତା, ରୋଜଗାର ଏବଂ ଜୀବିକାର ସୁଯୋଗ ପ୍ରଦାନ କରିବା ଲକ୍ଷ୍ୟରେ ଟିପି ସଦର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ୍ ଲିମିଟେଡ୍(ଟିପିଏସ୍ଓଡିଏଲ୍) ପକ୍ଷରୁ ଗଞ୍ଜାମ ଜିଲ୍ଲାର ନାରାୟଣପୁରଠାରେ ଏକ ଧନ୍ଦାମୂଳକ ପ୍ରଶିକ୍ଷଣ କେନ୍ଦ୍ର ଉଦ୍ଘାଟନ କରାଯାଇଛି। ଟିପିଏସ୍ଓଡିଏଲ୍ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ଅମିତ କୁମାର ଗର୍ଗଙ୍କ ସମେତ କମ୍ପାନୀର ବରିଷ୍ଠ ଅଧିକାରୀମାନେ ଏହି କେନ୍ଦ୍ରର ଆନୁଷ୍ଠାନିକ ଉଦ୍ଘାଟନ କରିଥିଲେ।
ଏହି କେନ୍ଦ୍ରରେ ବ୍ୟୁଟିସିଆନ୍ ସେବା, କମ୍ପ୍ୟୁଟର ଦକ୍ଷତା ଏବଂ ସିଲେଇ ଭଳି ବିଭିନ୍ନ ବିଷୟରେ ପ୍ରଶିକ୍ଷଣ ପାଇଁ ୧୨୦ରୁ ଅଧିକ ମହିଳା ଓ ଯୁବବର୍ଗଙ୍କୁ ସାମିଲ କରାଯାଇଛି। ପ୍ରଶିକ୍ଷଣ ପାଠ୍ୟକ୍ରମଗୁଡ଼ିକୁ ଏପରି ଭାବେ ପ୍ରସ୍ତୁତ କରାଯାଇଛି, ଯାହା ଅଂଶଗ୍ରହଣକାରୀମାନଙ୍କ ରୋଜଗାର ଯୋଗ୍ୟତା ବୃଦ୍ଧି କରିବା ସହିତ ନିଯୁକ୍ତି, ସ୍ୱୟଂ ରୋଜଗାର ଏବଂ ଛୋଟ ଛୋଟ ଜୀବିକାଧାରିତ କାର୍ଯ୍ୟ ପାଇଁ ଆବଶ୍ୟକ ଦକ୍ଷତା ବିକାଶରେ ସହାୟକ ହେବ।
ଏହି ଅବସରରେ ଟିପିଏସ୍ଓଡିଏଲ୍ର ସିଇଓ ଶ୍ରୀ ଅମିତ କୁମାର ଗର୍ଗ କହିଛନ୍ତି, “ଟିପିଏସ୍ଓଡିଏଲ୍ର ଭୂମିକା କେବଳ ବିଦ୍ୟୁତ ଯୋଗାଣରେ ସୀମିତ ନୁହେଁ। ଆମେ ଯେଉଁ ଉପଭୋକ୍ତା ସମୁଦାୟର ସେବା କରୁଛୁ, ସେମାନଙ୍କର କଲ୍ୟାଣ ଓ ବିକାଶ ପାଇଁ ମଧ୍ୟ ଆମେ ପ୍ରତିବଦ୍ଧ। ମହିଳା ଓ ଯୁବବର୍ଗଙ୍କୁ ବ୍ୟବହାରିକ ଏବଂ ରୋଜଗାରମୁଖୀ ଦକ୍ଷତା ପ୍ରଦାନ କରି ସେମାନଙ୍କୁ ରୋଜଗାରର ସୁଯୋଗ ହାସଲ କରିବା, ନିଜ ପାଇଁ ଜୀବିକାର ମାଧ୍ୟମ ସୃଷ୍ଟି କରିବା ଏବଂ ନିଜ ଗୋଡ଼ରେ ଠିଆ ହେବାରେ ସହାୟତା କରିବା ଆମର ଲକ୍ଷ୍ୟ। ଏଭଳି ପଦକ୍ଷେପ ମାଧ୍ୟମରେ ପରିବାରର ଆର୍ଥିକ ସ୍ଥିତିରେ ସୁଧାର ଆଣିବା ସହିତ ସମୁଦାୟର ସାମାଜିକ ଓ ଆର୍ଥିକ ବିକାଶକୁ ମଧ୍ୟ ଆଗକୁ ନେଇହେବ।”
ଏହି ପଦକ୍ଷେପ ମାଧ୍ୟମରେ ଟିପିଏସ୍ଓଡିଏଲ୍ର ସିଏସଆର ଟିମ୍ ମହିଳା ଓ ଯୁବବର୍ଗଙ୍କ ପାଇଁ ଦକ୍ଷତା ବିକାଶ ଏବଂ ଜୀବିକାର ସୁଯୋଗ ସୃଷ୍ଟି କରି ଉପଭୋକ୍ତା ସମୁଦାୟର ସାମଗ୍ରିକ ବିକାଶରେ ସହଯୋଗ କରିବାକୁ ଲକ୍ଷ୍ୟ ରଖିଛି। ପ୍ରଶିକ୍ଷଣ ମାଧ୍ୟମରେ ସେମାନଙ୍କ ଦକ୍ଷତା ବଢ଼ାଇବା ସହିତ ନିଜେ ରୋଜଗାର କରିବାର ସୁଯୋଗକୁ ପ୍ରୋତ୍ସାହିତ କରାଯିବ। ଏହା ଦ୍ୱାରା ମହିଳା ଓ ଯୁବବର୍ଗ ନିଜ ପାଇଁ ଆୟର ସୁଯୋଗ ସୃଷ୍ଟି କରିବା ସହ ପରିବାରର ଆର୍ଥିକ ସ୍ଥିତିରେ ସୁଧାର ଆଣିପାରିବେ ଏବଂ ସମୁଦାୟର ଆର୍ଥିକ ବିକାଶରେ ମଧ୍ୟ ଯୋଗଦାନ କରିପାରିବେ।
