ବନ୍ୟା ସ୍ଥିତିକୁ ନେଇ ଆସିଲା ବଡ଼ ସୂଚନା

ରାଜ୍ୟରେ ଲଗାଣ ବର୍ଷା ପରେ ବନ୍ୟା ସ୍ଥିତିକୁ ନେଇ ଆସିଛି ବଡ଼ ସୂଚନା। ରାଜ୍ୟର ବିଭିନ୍ନ ନଦୀର ଜଳସ୍ତର ଉପରମୁହାଁ ଥିବା ବେଳେ ଦକ୍ଷିଣ ଓଡ଼ିଶାର ସମସ୍ତ ନଦୀର ଜଳସ୍ତର ବଢୁଥିବା ସୂଚନା ଦେଇଛି ଜଳ ସମ୍ପଦ ବିଭାଗ। ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ବନ୍ୟା ସ୍ଥିତି ନେଇ ଗୁରୁତ୍ୱପୂର୍ଣ୍ଣ ସୂଚନା  ଦେଇ କହିଛନ୍ତି, ଦକ୍ଷିଣ ଓଡ଼ିଶାର ସମସ୍ତ ନଦୀର ଜଳସ୍ତର ବର୍ତ୍ତମାନ ବୃଦ୍ଧି ପାଉଛି। ଲଗାଣ ବର୍ଷା ଯୋଗୁଁ ନଦୀଗୁଡ଼ିକରେ ଜଳ ପ୍ରବାହ ବଢ଼ିଥିବାରୁ ସ୍ଥିତି ଉପରେ ନଜର ରଖାଯାଇଛି। ଏହି ସମୟରେ ଇନ୍ଦ୍ରାବତୀ ଡ୍ୟାମର ୫ଟି ଗେଟ୍ ଖୋଲାଯାଇଛି। ଡ୍ୟାମର ଜଳସ୍ତର ଓ ନଦୀରେ ଜଳ ପ୍ରବାହକୁ ନଜରରେ ରଖି ଏହି ପଦକ୍ଷେପ ନିଆଯାଇଛି।

ତେବେ ଉତ୍ତର ଓଡ଼ିଶାର ସୁବର୍ଣ୍ଣରେଖା ନଦୀକୁ ନେଇ ଆଶ୍ୱସ୍ତିକର ସୂଚନା ମିଳିଛି। ସୁବର୍ଣ୍ଣରେଖାରେ ବଡ଼ ବନ୍ୟା ହେବାର ଆଶଙ୍କା ନଥିବା ବିଭାଗ ପକ୍ଷରୁ କୁହାଯାଇଛି। ସୁବର୍ଣ୍ଣରେଖା ଏବଂ ବୁଢ଼ାବଳଙ୍ଗ ନଦୀର ଜଳସ୍ତର ବଢ଼ିଲେ ମଧ୍ୟ ଏହା କେବଳ ସତର୍କ ସୂଚନା ସ୍ତରକୁ ଛୁଇଁପାରେ ବୋଲି ସୂଚନା ରହିଛି। ସେହିପରି ବ୍ରାହ୍ମଣୀ ଓ ମହାନଦୀକୁ ନେଇ ମଧ୍ୟ ବଡ଼ ବନ୍ୟାର ଆଶଙ୍କା ନଥିବା କୁହାଯାଇଛି। ଏହି ଦୁଇ ପ୍ରମୁଖ ନଦୀର ଜଳସ୍ତର ଉପରେ ମଧ୍ୟ ବିଭାଗର ନଜର ରହିଛି।

ଅର୍ଥାତ୍ ରାଜ୍ୟରେ ବର୍ଷା ଓ ନଦୀ ଜଳସ୍ତର ବଢ଼ୁଥିଲେ ମଧ୍ୟ ବର୍ତ୍ତମାନ ସମସ୍ତ ପ୍ରମୁଖ ନଦୀର ସ୍ଥିତି ସମାନ ନୁହେଁ। ଦକ୍ଷିଣ ଓଡ଼ିଶାରେ ନଦୀ ଜଳସ୍ତର ବୃଦ୍ଧି ପାଉଥିବା ବେଳେ ଇନ୍ଦ୍ରାବତୀ ଡ୍ୟାମ୍ର ୫ଟି ଗେଟ୍ ଖୋଲାଯାଇଛି। ଅନ୍ୟପଟେ ସୁବର୍ଣ୍ଣରେଖା, ବୁଢ଼ାବଳଙ୍ଗ, ବ୍ରାହ୍ମଣୀ ଓ ମହାନଦୀକୁ ନେଇ ବର୍ତ୍ତମାନ ବଡ଼ ବନ୍ୟା ଆଶଙ୍କା ନଥିବା ସୂଚନା ମିଳିଛି।