ଆଇଏଏସ ସ୍ତରରେ ବଡ଼ ଧରଣର ଅଦଳବଦଳ

ଆଇଏଏସ ସ୍ତରରେ ବଡ଼ ଧରଣର ଅଦଳବଦଳ । ଦେଓ ରଞ୍ଜନଙ୍କୁ ଇସ୍ପାତ ଓ ଖଣି, ଅରବିନ୍ଦଙ୍କୁ ରାଜସ୍ବ । ରାଜ୍ୟ ସରକାର ଆଜି ଆଇଏଏସ ସ୍ତରରେ ବଡ଼ ଅଦଳବଦଳ କରିଛନ୍ତି । ଉନ୍ନୟନ କମିଶନର ଦେଓ ରଞ୍ଜନ କୁମାର ସିଂଙ୍କୁ ଅତିରିକ୍ତ ଭାବେ ଇସ୍ପାତ ଓ ଖଣି ବିଭାଗର ମୁଖ୍ୟ ଶାସନ ସଚିବ (ଏସିଏସ) ଭାବେ ନିଯୁକ୍ତି ମିଳିଛି । ଇସ୍ପାତ ବିଭାଗର ଅତିରିକ୍ତ ଶାସନ ସଚିବ ସୁରେନ୍ଦ୍ର କୁମାରଙ୍କୁ ସାଧାରଣ ପ୍ରଶାସନ (ଜିଏ)ର ଏସିଏସ ଭାବେ ନିଯୁକ୍ତି ମିଳିଛି । ପୂର୍ବ ଭଳି ସେ ସଂସଦୀୟ ବ୍ୟାପାର ବିଭାଗର ଏସିଏସ ଦାୟିତ୍ବ ତୁଲାଇବେ । ସେହିପରି ବିଷ୍ଣୁପଦ ସେଠୀଙ୍କୁ ଓଡ଼ିଶା ବନ ଉନ୍ନୟନ ନିଗମର ଅଧ୍ୟକ୍ଷ ଭାବେ ନିଯୁକ୍ତି ମିଳିଛି । ଏହାଛଡ଼ା ସେ କେବିକେର ମୁଖ୍ୟ ପ୍ରଶାସକ ଭାର ତୁଲାଇବେ । ଶ୍ରମ ଓ ଇଏସଆଇ ବିଭାଗର ଏସିଏସ୍ ଚିତ୍ରା ଅରୁମୁଗମଙ୍କୁ ବିଜ୍ଞାନ ଓ କାରିଗରୀ ବିଭାଗର ଏସିଏସ୍ ଭାବେ ଦାୟିତ୍ବ ମିଳିଛି  । ଗୋପବନ୍ଧୁ ପ୍ରଶାସନିକ ଏକାଡେମିର ଡିଜି ଭାବେ ଅତିରିକ୍ତ ଦାୟିତ୍ବ ମିଳିଛି । କୃଷି ସଚିବ ଡ. ଅରବିନ୍ଦ ପାଢୀଙ୍କୁ ରାଜସ୍ବ ବିଭାଗର ଏସିଏସ୍ ଦାୟିତ୍ବ ଦେଇଛନ୍ତି ସରକାର । ଏହାସହ ସେ ଅତିରିକ୍ତ ଭାବେ ଶ୍ରୀଜଗନ୍ନାଥ ମନ୍ଦିର ପ୍ରଶାସନର ମୁଖ୍ୟ ପ୍ରଶାସକ ଭାର ସମ୍ଭାଳିବେ ।  ଗୃହ ଓ ନଗର ଉନ୍ନୟନ ବିଭାଗର ଏସିଏସ୍ ଉଷା ପାଢୀଙ୍କୁ ଇଡକୋର ଅଧ୍ୟକ୍ଷ ଭାବେ ଅତିରିକ୍ତ ଦାୟିତ୍ବ ଦେଇଛନ୍ତି ସରକାର । 

ସେହିଭଳି ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗର ପ୍ରମୁଖ ସଚିବ ସୁରେଶ ବଶିଷ୍ଠଙ୍କୁ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗର ପ୍ରମୁଖ ସଚିବ ଭାବେ ଦାୟିତ୍ବ ମିଳିଛି । ମହିଳା ଓ ଶିଶୁ ବିକାଶ ବିଭାଗର ସଚିବ ଶୁଭା ଶର୍ମାଙ୍କୁ ଜଳ ସମ୍ପଦ ବିଭାଗର ପ୍ରମୁଖ ସଚିବ ଭାବେ ଅବସ୍ଥାପିତ କରାଯାଇଛି ।  ସାଧାରଣ ଉଦ୍ୟୋଗ ବିଭାଗର ପ୍ରମୁଖ ସଚିବ ତଥା ଓଏସଆରଟିସିର ଏମଡି ଏନବିଏସ୍ ରାଜପୁତ୍ ବାଣିଜ୍ୟ ଓ ପରିବହନ ବିଭାଗର ପ୍ରମୁଖ ସଚିବ ଭାର ମୁଣ୍ଡାଇବେ । ପୂର୍ବ ଭଳି ସେ ଓଏସଆରଟିସିର ଏମଡି ଦାୟିତ୍ବ ମଧ୍ୟ ତୁଲାଇବେ । ପଞ୍ଚାୟତରାଜ ସଚିବ ଗିରିଶ ଏସଏନ ଓଡ଼ିଶା ଖଣି ନିଗମର ଅଧ୍ୟକ୍ଷ ଭାବେ ଅତିରିକ୍ତ ଦାୟିତ୍ବ ତୁଲାଇବେ । ଦିଲ୍ଲୀରୁ ଫେରିବା ପରେ ଡ. ମୃଣାଳିନୀ ଦର୍ସ୍ବାଲ ମହିଳା ଓ ଶିଶୁ ବିକାଶ ବିଭାଗର ସଚିବ ଭାବେ ନିଯୁକ୍ତି ପାଇଛନ୍ତି । ରାଜେଶ ପ୍ରଭାକର ପାଟିଲଙ୍କୁ ଓଡ଼ିଶା ପଣ୍ୟାଗାର ନିଗମର ଅଧ୍ୟକ୍ଷ, ଏସଆରସି ଓ ଓସଡମାର ଏମଡି ଭାବେ ଅତିରିକ୍ତ ଦାୟିତ୍ବ ମୁଣ୍ଡାଇବେ ।

ପର୍ଯ୍ୟଟନ ସଚିବ ବଲଓ୍ବନ୍ତ ସିଂ ନୂଆ କରି ସରକାର ଗଠନ କରିଥିବା ଓଡ଼ିଶା ରାଜ୍ୟ ରାଜପଥ କର୍ତ୍ତୃପକ୍ଷର ଏମଡି ଭାବେ ଅତିରିକ୍ତ ଦାୟିତ୍ବ ସମ୍ଭାଳିବେ । କ୍ରୀଡ଼ା ଓ ଯୁବ ବ୍ୟାପାର ବିଭାଗ ସଚିବ ସଚିନ ରାମଚନ୍ଦ୍ର ଯାଦବ କୃଷି ଓ କୃଷକ ସଶକ୍ତିକରଣ ବିଭାଗର ସଚିବ ଭାର ସମ୍ଭାଳିବେ । କ୍ରୀଡ଼ା ଓ ଯୁବ ବିଭାଗର ଦାୟିତ୍ବ ମଧ୍ୟ ପୂର୍ବ ଭଳି ସେ ତୁଲାଇବେ । ଓଡ଼ିଶା ଦକ୍ଷତା ବିକାଶ କର୍ତ୍ତୃପକ୍ଷର ନିର୍ଦ୍ଦେଶକ ରଶ୍ମିତା ପଣ୍ଡା ବିଡିଏର ଉପାଧ୍ୟକ୍ଷ ଭାବେ ନିଯୁକ୍ତି ପାଇଛନ୍ତି । ଏହାସହ ସେ ଭୁବନେଶ୍ବର ସ୍ମାର୍ଟସିଟି ଲିମିଟେଡର ଏମଡି ଏବଂ ଗୃହ ଓ ନଗର ଉନ୍ନୟନ ବିଭାଗର ସ୍ବତନ୍ତ୍ର ସଚିବ ଭାବେ କାମ କରିବେ ।

ମତ୍ସ୍ୟ ସମ୍ପଦ ନିର୍ଦ୍ଦେଶକ ମହମ୍ମଦ ସାଦିକ୍ ଆଲାମ୍ ସାଧାରଣ ଉଦ୍ୟୋଗ ବିଭାଗର ସଚିବ ଭାବେ କାମ କରିବେ। ଅତିରିକ୍ତ ଭାବେ କ୍ରୁଟର ଏମଡି ଦାୟିତ୍ବ ମଧ୍ୟ ସମ୍ଭାଳିବେ । ଉଠା ଜଳସେଚନ ନିଗମ ଏମଡି ମାନସୀ ନିମ୍ଭାଲ ମିଶନ ଶକ୍ତିର ସଚିବ ଭାବେ ନିଯୁକ୍ତି ପାଇଛନ୍ତି । ହସ୍ତଶିଳ୍ପ ନିର୍ଦ୍ଦେଶକ ପ୍ରେମଚନ୍ଦ୍ର ଚୌଧୁରୀ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ସଚିବ ଭାର ତୁଲାଇବେ । ମୁଖ୍ୟମନ୍ତ୍ରୀଙ୍କ ଅତିରିକ୍ତ ସଚିବ ଥିବା ଅନୁପମ ସାହଙ୍କୁ ଓଡ଼ିଶା ବ୍ରିଜ୍ ଓ କନଷ୍ଟ୍ରକସନର ଏମଡି, ଦକ୍ଷିଣାଞ୍ଚଳ ଆରଡିସି ସଂଗ୍ରାମ କେଶରୀ ମହାପାତ୍ରଙ୍କୁ ଉତ୍ତରାଞ୍ଚଳ ଆରଡିସି ଏବଂ ପଶ୍ଚିମ ଓଡ଼ିଶା ବିକାଶ ପରିଷଦର ଅଧ୍ୟକ୍ଷ ଭାବେ ଅତିରିକ୍ତ ଦାୟିତ୍ବ ଦେଇଛନ୍ତି ସରକାର ।