ପୁଣି ଥରେ ଶ୍ରୀଜୀଉଙ୍କ ଅଳଙ୍କାର ଗଣତି ପାଇଁ ଦାବି କଲେ ବିଜୟ

ଭୁବନେଶ୍ବର () ନ୍ୟାୟିକ ତଦନ୍ତ ନିର୍ଦ୍ଦେଶ ପରେ ବି ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିବା ବିବାଦ ତୁଟୁନି। ସାଧାରଣରେ ରତ୍ନଭଣ୍ଡାର ଚାବି ହଜିବା ନେଇ ସୃଷ୍ଟି ହେଉଥିବା ସଂଶୟ ଓ ସନ୍ଦେହ ଦୂର କରିବାକୁ ରତ୍ନଭଣ୍ଡାର ପୁଣି ଥରେ ଖୋଲାଯିବାକୁ ଦାବି କରିଛନ୍ତି ବିଜେପିର ବରିଷ୍ଠ ନେତା ବିଜୟ ମହାପାତ୍ର । ସେ କହିଛନ୍ତି, ଶ୍ରୀଜୀଉଙ୍କ ଅଳଙ୍କାରର ପୁନଃହିସାବ ହେଲେ ଲୋକଙ୍କ ମନରୁ ସନ୍ଦେହ ଦୂର ହେବ । ସ୍ବତନ୍ତ୍ର କମିଟି ଗଠନ କରାଯାଇ ସୁରକ୍ଷା ବ୍ୟବସ୍ଥା ଭିତରେ ରତ୍ନଭଣ୍ଡାର ଖୋଲାଯାଇ ସମ୍ପତି ପୁଣି ଆକଳନ କରାଯାଉ । ୧୯୮୫ ମସିହାରେ ଶେଷ ଥର ଲାଗି ଅଳଙ୍କାରର ଆକଳନ କରାଯାଇ ଚାବି ପକାଯାଇଥିଲା । ତେଣୁ ପୁଣି ଥରେ ତଦନ୍ତ କରି 33 ବର୍ଷ ତଳେ ହୋଇଥିବା ତାଲିକା ସହ ମେଳ କରାଯିବା ଉଚିତ ବୋଲି ସେ କହିଛନ୍ତି  ।

ନ୍ୟାୟିକ ତଦନ୍ତ ଘୋଷଣା ହୋଇଛି, ତେଣୁ ଏହାର ତଦନ୍ତ କରାଯାଇ ରିପୋର୍ଟକୁ ସାର୍ବଜନୀନ କରାଯାଉ । ତଦନ୍ତ କମିଶନଙ୍କ ତତ୍ବାବଧାନରେ ମଧ୍ୟ ଭିତର ରତ୍ନଭଣ୍ଡାର ଖୋଲିବାକୁ କମିଟି ଗଠିତ ହେବା ଉଚିତ  । 1985 ମସିହା ପରଠାରୁ ଯେଉଁମାନେ ଶ୍ରୀମନ୍ଦିର ପ୍ରଶାସନ ଦାୟିତ୍ବରେ ଥିଲେ ସେମାନେ ଚାବିର ସତ୍ୟାସତ୍ୟ ନେଇ ଅନୁଧ୍ୟାନ କରିବା ଆବଶ୍ୟକତା ଥିଲା  ।

1985 ପୂର୍ବରୁ 1978 ଓ 1982 ମଧ୍ୟ ରତ୍ନଭଣ୍ଡାର ଖୋଲିଥିଲା  । 1978ରେ ତତ୍କାଳୀନ ରାଜ୍ୟାପାଳ ଡକ୍ଟର ବି.ଡି. ଶର୍ମାଙ୍କ ଅଧ୍ୟକ୍ଷତାରେ କମିଟି ଗଠନ କରାଯାଇଥିଲା  । ସେହି କମିଟିରେ ପୂର୍ବତନ ମୁଖ୍ୟମନ୍ତ୍ରୀ ଡକ୍ଟର ହରେକୃଷ୍ଣ ମହତାବ, ବିଶ୍ବନାଥ ଦାସ, ନିତ୍ୟାନନ୍ଦ କାନୁନଗୋ ଓ ଜଷ୍ଟିସ ହରିହର ମହାପାତ୍ରଙ୍କ ଭଳି ବ୍ୟକ୍ତିମାନେ ସଦସ୍ୟ ରହିଥିଲେ  । ତେଣୁ ଏଥର କମିଟି ଗଠନ ସମୟରେ ମଧ୍ୟ ରାଜ୍ୟ ସରକାର ଏଭଳି ସଦସ୍ୟ ଗ୍ରହଣ କରନ୍ତୁ ଯାହାଙ୍କ ନୈତିକତା ନେଇ କେହି ପ୍ରଶ୍ନ ଉଠାଇପାରିବେନି

ସେପଟେ ରତ୍ନଭଣ୍ଡାରର ଚାବି ହଜିଯିବା ପ୍ରସଙ୍ଗରେ ସ୍ପଷ୍ଟିକରଣ ରଖିଛି ଶ୍ରୀମନ୍ଦିର ପ୍ରଶାସନ । ଗତ ରାତିରେ ଏ ସଂପର୍କରେ ଏକ ପ୍ରେସ ବିଜ୍ଞପ୍ତି ଜାରି କରାଯାଇଛି  । ଏଥିରେ କୁହାଯାଇଛି ଯେ, ମହାପ୍ରଭୁଙ୍କ ସମସ୍ତ ଅଳଙ୍କାର ରତ୍ନଭଣ୍ଡାରରେ ସୁରକ୍ଷିତ ଅଛି । ତେବେ ୩ଟି ଯାକ ଚାବିରୁ ଗୋଟିଏ ହଜିଯିବା କଥା ସତ ବୋଲି ଶ୍ରୀମନ୍ଦିର ପ୍ରଶାସନ ସ୍ବୀକାର କରିଛି । ପ୍ରଶାସନ ପକ୍ଷରୁ କୁହାଯାଇଛି ଯେ, ରତ୍ନଭଣ୍ଡାର ୨ ଭାଗରେ ବିଭକ୍ତ । ବାହାର ରତ୍ନଭଣ୍ଡାର ଓ ଭିତର ରତ୍ନଭଣ୍ଡାର । ବାହାର ଭଣ୍ଡାରଘର ଖୋଲାନଗଲେ ରତ୍ନଭଣ୍ଡାର ଖୋଲିବା ଅସମ୍ଭବ । ଶେଷଥର ପାଇଁ ଭିତର ରତ୍ନଭଣ୍ଡାର ୧୯୮୫ ମସିହାରେ ଖୋଲାଯାଇଥିଲା ଓ କାର୍ଯ୍ୟ ଶେଷ ପରେ ସେଠାରେ ସେଠାରେ ପଡିଥିବା ୩ଟି ତାଲା ମଧ୍ୟରୁ ଗୋଟିଏ ତାଲାରେ ଜଉମୁଦ ଦିଆଯାଇଥିଲା, ଯାହା ବର୍ତମାନ ଯାଏଁ ଅକ୍ଷୂର୍ଣ୍ଣ ଅବସ୍ଥାରେ ଅଛି । ଏହା ପ୍ରମାଣ କରିଛି ଭିତର ରତ୍ନଭଣ୍ଡାରରେ କୌଣସି ଅବ୍ୟବସ୍ଥା ହୋଇନାହିଁ ।

ଏଭିତରେ ଆମ ହାତରେ ଲାଗିଛି 1978 ଓ 1985 ରତ୍ନଭଣ୍ଡାର ଖୋଲାଯିବା ସଂପର୍କିତ ରିପୋର୍ଟ  । 1978ରେ ହୋଇଥିବା କମିଟି ଭିତର ରତ୍ନଭଣ୍ଡାର ଜାଂଚ କରି ରାଜ୍ୟ ସରକାରଙ୍କୁ ରିପୋର୍ଟ ଦେଇଥିଲେ  । ତଦନୁଯାଇ, ଭିତର ରତ୍ନଭଣ୍ଡାରରେ ଶ୍ରୀଜୀଉଙ୍କ ମୁଣ୍ଡ, କାନ, ନାକ, ବେକ, କଚଟି, ଆଙ୍ଗୁଠି, ଅଣ୍ଟା ଓ ଗୋଡ ପାଇଁ 8175 ଭରି 79ଟି ସୁନା ଅଳଙ୍କାର ରହିଛି  । 4671 ଭରି ରୂପା ପୂଜା ସାମଗ୍ରୀ ଓ ବାସନକୁସନ ରହିଛି  । ଶ୍ରୀଜୀଉଙ୍କ ଦୈନନ୍ଦିନ ବ୍ୟବହାରରେ ଲାଗୁଥିବା 299 ଭରି ସୁନା ଓ 2603 ଭରି ରୂପା ଅଳଙ୍କାର ଓ ସାମଗ୍ରୀ ରହିଛି  । ଦୁର୍ମୂଲ୍ୟ ପଥର ଖଚିତ 12,838 ଭରି ଓଜନର 454ଟି ସୁନା ଅଳଙ୍କାର ଓ 22,153 ଭରି ଓଜନର 293ଟି ରୂପା ଅଳଙ୍କାର ରହିଛି  ।

1985 ରିପୋର୍ଟରେ ଭିତର ରତ୍ନଭଣ୍ଡାର ଖୋଲାଯାଇ ଗଣତି ପରେ ପୁଣି ଥରେ ଜଉମୁଦ ଦେଇ ତାଲା ବନ୍ଦ କରାଯାଇଛି  । ଏ ସଂପର୍କରେ ଗଠିତ କମିଟି ରିପୋର୍ଟ ଦାଖଲ ସମୟରେ ସମସ୍ତ ସ୍ବାକ୍ଷର କରିଛନ୍ତି  । କିନ୍ତୁ ଜଉମୁଦ ପରେ ଚାବି କାହାକୁ ହସ୍ତାନ୍ତର କରାଯାଇଛି କିମ୍ବା କେଉଁଠି ରଖାଯାଇଛି ସେ ସଂପର୍କରେ କିଛି କୁହାଯାଇନି  ।

Share

Leave a Reply

Your email address will not be published. Required fields are marked *

three × 2 =