ବିକାଶ ନାମରେ ତପସ୍ଥଳୀକୁ ଭୋଗସ୍ଥଳୀ କରିବା ଉଚିତ ନୁହେଁ: ଜଗତଗୁର ଶଙ୍କରାଚାର୍ଯ୍ୟ
ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ ସାରା ରାଜ୍ୟରେ ବିବାଦ ବଢ଼ିବାରେ ଲାଗିଛି । ଏହା ମଧ୍ୟରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିବାଦ ଗତକାଲି ସବୁ ବର୍ଗର ଲୋକଙ୍କ ସହ ଆଲୋଚନା ପରେ ଆଜି ନିଜର ସ୍ପଷ୍ଟ ମତ ରଖିଛନ୍ତି ଜଗତଗୁରୁ ଶଙ୍କରାଚାର୍ୟ୍ୟ। ସେ କହିଛନ୍ତି ଯେ ‘ପୁରୀରେ ବିକାଶ ନାମରେ ଯେଉଁ ହାହୋଲ୍ଲା ହେଉଛି ତାହା ଏହି ପବିତ୍ର ଧାମର ଅସ୍ତିତ୍ବ ଓ ଆଦର୍ଶର ବିଲୋପର ମାର୍ଗ ପ୍ରସ୍ତୁତ କରୁଛି। ଶାସନତନ୍ତ୍ରର ଏହା ଦାୟିତ୍ବ ଯେ ତୀର୍ଥସ୍ଥଳୀକୁ ଭୋଗସ୍ଥଳୀର ରୂପ ପ୍ରଦାନ ନକରୁ। ମୁଁ ବିକାଶକୁ ସମର୍ଥନ କରେ। ମାତ୍ର ବିକାଶ ନାମରେ ତୀର୍ଥସ୍ଥାନର ଅସ୍ତିତ୍ବ ଓ ଆଦର୍ଶ ବିଲୁପ୍ତ ହୋଇଯିବ ଏହାକୁ ସମର୍ଥନ କରେ ନାହିଁ। ଶାସନତନ୍ତ୍ର ପରମ୍ପରାପ୍ରସ୍ତ ମଠଗୁଡ଼ିକୁ ରାସ୍ତାକୁ ବଡ଼ କରିବା ଉଦେଶ୍ୟରେ ଭାଙ୍ଗି ଦେଲା।
ଦେବାଦେବୀଙ୍କ ସ୍ଥାନକୁ ବି ବିଲୁପ୍ତ କରି ଦିଆଯାଇଛି ଓ ଏହ କାର୍ୟ୍ୟ ଏବେ ବି ଚାଲୁଛି। ଶାସନତନ୍ତ୍ର ଏହା ନଭାବୁ ଯେ ସେ ଖୁବ୍ ଶକ୍ତିଶାଳୀ। ଲୋକମତ କେବେ ବି ବିପରୀତ ହୋଇପାରେ। ଓଡ଼ିଶାର ଜନସାଧାରଣ ଯେଉଁ ରାଜନୈତିକ ଦଳକୁ ଶାସନ କରିବାର ସୁଯୋଗ ବର୍ଷ ବର୍ଷ ଧରି ଦେଇ ଆସିଛନ୍ତି ସେହି ଜନସାଧାରଣଙ୍କୁ ମୁଁ କହିବାକୁ ଚାହିଁବି କି ପୁରୀର ଧାର୍ମିକ ଆଦର୍ଶକୁ ବିକୃତ ଓ ବିଲୁପ୍ତ କରିବାର ପ୍ରୟାସ କରାଯାଉଛି। ଧାର୍ମିକସ୍ଥଳକୁ ପ୍ରଦର୍ଶନୀସ୍ଥଳ ବା ପିକ୍ନିକ୍ କେନ୍ଦ୍ର ବନାଇବା ଉଚିତ ନୁହେଁ। ତପସ୍ଥଳୀକୁ ଭୋଗସ୍ଥଳୀ କରିବା କଦାପି ଉଚିତ ନୁହେଁ ବୋଲି ଜଗତଗୁରୁ ଶଙ୍କରାଚାର୍ଯ୍ୟ କହିଛନ୍ତି । ଏ ଖବର ସାମ୍ନାକୁ ଆସିବା ପରେ ସାରା ରାଜ୍ୟରେ ଏନେଇ ଚର୍ଚ୍ଚା ଜୋର ଧରିବାରେ ଲାଗିଛି ।
