ସମ୍ବଲପୁରରେ ଏନକାଉଣ୍ଟର

ପୋଲିସ ଏନକାଉଣ୍ଟରରେ ଦୁର୍ଦ୍ଦାନ୍ତ ଅପରାଧୀ ଟିମା ଝାଙ୍କର ଆହତ । ସମ୍ବଲପୁର ନାକଟିଦେଉଳ ପୋଲିସ ଏହି ଏନକାଉଣ୍ଟର କରିଛି । ପୋଲିସକୁ ଚ୍ୟାଲେଞ୍ଜ କରି ଖସି ପଳାଇବାକୁ ଅଭିଯୁକ୍ତ ଜଣକ ପୋଲିସ ଉପରକୁ ଗୁଳି ଚଳାଇଥିଲା । ଆତ୍ମରକ୍ଷା ପାଇଁ ପୋଲିସ ପକ୍ଷରୁ ପାଲଟା ଗୁଳି ଚାଳନା କରାଯାଇଥିଲା ।

ଆହତ ଅଭିଯୁକ୍ତ ଟିମା ଓରଫ ଧନେଶ୍ୱର ଝାଙ୍କରକୁ ତୁରନ୍ତ ଚିକିତ୍ସା ପାଇଁ ରେଢ଼ାଖୋଲ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଛି। ଏହି ଘଟଣାରେ ଅଧିକ ତଦନ୍ତ ଜାରି ରହିଛି। ଓଡ଼ିଶାର ବିଭିନ୍ନ ଜିଲ୍ଲାରେ ଡକାୟତି, ରାହାଜାନି, ଆର୍ମସ୍ ଆକ୍ଟ ଏବଂ ଆଲୁମିନିୟମ ତାର ଚୋରି ଭଳି ୪୧ରୁ ଅଧିକ ଅପରାଧିକ ମାମଲାରେ ସେ ସଂପୃକ୍ତ ଥିବା ପୋଲିସ ସୂଚନା ଦେଇଛି ।

ପୂର୍ବ ସୂଚନା ମୁତାବକ, ଭୋରରୁ ଟିମାକୁ କାବୁ କରିବାକୁ ଯାଉଥିଲା ପୋଲିସ । ତେବେ ଫିଲ୍ମ ଷ୍ଟାଇଲରେ ଡ଼ୁମଛାଲି ଜଙ୍ଗଲରେ ଲୁଚି ରହି ପୋଲିସ ଉପରକୁ ଗୁଳି କରିଥିଲା ଟିମା । ପାଖାପାଖି ୩ ରାଉଣ୍ଡ ଗୁଳିମାଡ କରିଥିଲା ଟିମା । ଫଳରେ ପୋଲିସ ଆତ୍ମରକ୍ଷା କରିବାକୁ ପାଲଟା ଗୁଳାମାଡ କରିଥିଲା । ଯେଉଁଥିରେ ଟିମାର ଗୋଡ଼ରେ ବାଜିଥିଲା ଗୁଳି । ଘଟଣା ସ୍ଥଳରେ ଆହତ ହୋଇପଡିଥିଲା ଅପରାଧୀ । ସଂଗେ ସଂଗେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଅନ୍ ସ୍ପଟରୁ ଗୋଟିଏ ପିସ୍ତଲ, ଜୀବନ୍ତ ଗୁଳି, ବିଦ୍ୟୁତ ତାର କଟର ଜବତ କରିବା ସହ ୩ ସହଯୋଗୀକୁ ଗିରଫ କରିଛି ।