କେନ୍ଦ୍ର ବିରୋଧରେ ଗର୍ଜିଲା ବିଜେଡି

ଅନୁସୂଚିତ ଜାତି ଜାନଜାତୀ ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳ

ଭୁବନେଶ୍ବର () ଅନୁସୂଚିତ ଜାତି ଜନଜାତୀ ଛାତ୍ରଛାତ୍ରୀଙ୍କୁ ଷ୍ଟାଇପେଣ୍ଡ ପ୍ରଦାନରେ କେନ୍ଦ୍ର ସରକାରଙ୍କ ଟାଳଟୁଳ ନୀତିକୁ ବିରୋଧ କରି ଆଜି ବିଧାନସଭାରେ ଗର୍ଜିଛନ୍ତି ଶାସକ ବିଜେଡି ବିଧାୟକମାନେ । ବିଧାନସଭା ଭିତରେ ଓ ବିଧାନସଭା ବାହାରେ ଶାସକ ବିଜେଡିର ବିଧାୟକମାନେ ଓଡିଶାର ଅନୁସୂଚିତ ଜାତି ଓ ଜନଜାତି ଛାତ୍ରଛାତ୍ରୀଙ୍କ ମାଟ୍ରିକ ପରବର୍ତ୍ତି ଷ୍ଟାଇପେଣ୍ଡ ପାଇଁ ଆସୁଥିବା କେନ୍ଦ୍ରୀୟ ଅନୁଦାନର ହାର ପରିବର୍ତ୍ତନ ବିରୋଧରେ ପ୍ରତିବାଦ କରିଛନ୍ତି । କେନ୍ଦ୍ର ସରକାର ତୁରନ୍ତ ନିଜ ନିଷ୍ପତ୍ତିରେ ପରିବର୍ତ୍ତନ ପାଇଁ ଦାବି କରିଛନ୍ତି ବିଜେଡି ବିଧାୟକମାନେ ।

ସେପଟେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏ ପ୍ରସଙ୍ଗରେ ଗତ 17 ତାରିଖରେ କେନ୍ଦ୍ର ସମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରୀ ଥାବୋର ଚନ୍ଦ ଗେହଲଟଙ୍କୁ ଚିଠି ଲେଖି ତୁରନ୍ତ ହସ୍ତକ୍ଷେପ କରିବାକୁ ଦାବି କରିଛନ୍ତି । ମୁଖ୍ୟମନ୍ତ୍ରୀ ନିଜ ଚିଠିରେ ଲେଖିଛନ୍ତି ଯେ, ରାଜ୍ୟ ସରକାର ଉତ୍ତମ ମାନ ଶିକ୍ଷାକୁ ଗୁରୁତ୍ବ ଦେଉଛନ୍ତି । ଅନୁସୂଚିତ ଜାତି ଓ ଜନଜାତୀ ଛାତ୍ରଛାତ୍ରୀଙ୍କ ଉଚ୍ଚଶିକ୍ଷା ପାଇଁ ମଧ୍ୟ ଗୁରୁତ୍ବ ଦିଆଯାଉଛି । ରାଜ୍ୟର ପ୍ରାୟ 2 ଲକ୍ଷରୁ ଅଧିକ ଅନୁସୂଚିତ ଜାତି ଜନଜାତୀ ଛାତ୍ରଛାତ୍ରୀ ମାଟ୍ରିକ ପରବର୍ତ୍ତି ଷ୍ଟାଇପେଣ୍ଡ ପାଉଛନ୍ତି । ଏହି ଷ୍ଟାଇପେଣ୍ଡ ଏକ କେନ୍ଦ୍ରୀୟ ସହାୟତାପ୍ରାପ୍ତ ଯୋଜନା ।

ଏହି ଯୋଜନାରେ 2016-17 ପର୍ଯ୍ୟନ୍ତ କେନ୍ଦ୍ର ସମାଜିକ ନ୍ୟାୟ ଓ ସଶକ୍ତିକରଣ ବିଭାଗ 90 ପ୍ରତିଶତ ଏବଂ ରାଜ୍ୟ ସରକାର 10 ପ୍ରତିଶତ ବ୍ୟୟଭାର ବହନ କରୁଥିଲେ । ଏହିକ୍ରମରେ କେନ୍ଦ୍ର ସରକାର 2016-17ରେ 215.80 କୋଟି ଟଙ୍କା ଏବଂ ରାଜ୍ୟ ସରକାର 22.48 କୋଟି ଟଙ୍କା ବ୍ୟୟ ଭାର ବହନ କରିଥିଲେ । କିନ୍ତୁ 2017-18ରୁ କେନ୍ଦ୍ର ସରକାର ଏହି କେନ୍ଦ୍ରୀୟ ସହାୟତାପ୍ରାପ୍ତ ଯୋଜନାରେ କେନ୍ଦ୍ର ଓ ରାଜ୍ୟ ଅଂଶଧନରେ ପରିବର୍ତ୍ତନ କରିଛନ୍ତି । ଫଳରେ ରାଜ୍ୟ ସରକାର 80 ପ୍ରତିଶତ ଏବଂ କେନ୍ଦ୍ର ସରକାର 20 ପ୍ରତିଶତ ଅର୍ଥ ପ୍ରଦାନ କରୁଛନ୍ତି ।

ଫଳରେ 2017-18ରେ ରାଜ୍ୟ ସରକାର 238.28 କୋଟି ଏବଂ କେନ୍ଦ୍ର ସରକାର 35.12 କୋଟି ଟଙ୍କା ପ୍ରଦାନ କରିଥିଲେ । 2018-19ରେ ସେହିଭଳି ରାଜ୍ୟ ସରକାର 238.28 କୋଟି ଏବଂ କେନ୍ଦ୍ର ସରକାର 49.39 କୋଟି ଟଙ୍କା ମାଟ୍ରିକ ପରବର୍ତ୍ତି ଷ୍ଟାଇପେଣ୍ଡ ପାଇଁ ବ୍ୟୟ ଭାର ବହନ କରିବେ ବୋଲି ଆକଳନ କରାଯାଉଛି । ଏଭଳି କେନ୍ଦ୍ରୀୟ ଅଂଶଧନରେ ପରିବର୍ତ୍ତନ ରାଜ୍ୟର ଅନୁସୂଚିତ ଜାତି ଓ ଜନଜାତୀ ଛାତ୍ରଛାତ୍ରୀଙ୍କ ଶିକ୍ଷା ଗ୍ରହଣ ବ୍ୟବସ୍ଥାକୁ ପ୍ରଭାବିତ କରୁଛି । ତେଣୁ କେନ୍ଦ୍ରମନ୍ତ୍ରୀ ଏଥିରେ ହସ୍ତକ୍ଷେପ କରି ପୂର୍ବ ଭଳି କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ମଧ୍ୟରେ 90:10 ପ୍ରତିଶତ ହାରରେ ବ୍ୟୟ ବରାଦ କରିବାକୁ ମୁଖ୍ୟମନ୍ତ୍ରୀ ଦାବି କରିଛନ୍ତି ।

କେନ୍ଦ୍ର ସରକାରଙ୍କ ଏଭଳି ଏକତରଫା ନିଷ୍ପତ୍ତି ବିରୋଧରେ ବିଧାନସଭା ଭିତରେ ବିଜେଡି ସ୍ବର ଉତ୍ତୋଳନ କରିଥିଲା । ବିଜେଡିର ସ୍ବରକୁ କାଉଣ୍ଟର କରିବାକୁ ବିଜେପି ଢେଙ୍କାନାଳ ବିୟର ଫ୍ରାକ୍ଟ୍ରି ପ୍ରସଙ୍ଗ ଏବଂ କଂଗ୍ରେସ ସଚିବାଳୟରେ ସିବିଆଇ ପ୍ରବେଶ ପ୍ରସଙ୍ଗ ଉଠାଇଥିଲା । ଏହାଦ୍ବାରା ଅନୁସୂଚିତ ଜାତି ଓ ଜନଜାତି ଛାତ୍ରଛାତ୍ରୀଙ୍କ ଭବିଷ୍ୟତ ଷ୍ଟାଇପେଣ୍ଡ ସଂପର୍କିତ ଦାବି ଉପରେ ଆଲୋଚନା ହୋଇପାରିଲା ନାହିଁ ।

Share

Leave a Reply

Your email address will not be published. Required fields are marked *

4 × 2 =