ଟି-୨୦ରେ ରେକର୍ଡ କଲେ ଶ୍ରେୟସ

ଟିମ୍ ଇଣ୍ଡିଆର ବ୍ୟାଟସ୍ମ୍ୟାନ୍ ଶ୍ରେୟସ ଆୟର ଟି-୨୦ରେ ରେକର୍ଡ କରିଛନ୍ତି। ସେ ଆଜି ଟିମ୍ ଇଣ୍ଡିଆର ଅନ୍ୟତମ ବ୍ୟାଟସ୍ମ୍ୟାନ୍ ରିଷଭ ପନ୍ତଙ୍କ ଟି-୨୦ ରେକର୍ଡକୁ ଭାଙ୍ଗି ଭାରତ ପାଇଁ ଏହି ଫର୍ମାଟରେ ସର୍ବାଧିକ ବ୍ୟକ୍ତିଗତ ସ୍କୋର ହାସଲକାରୀ ଖେଳାଳି ହୋଇଯାଇଛନ୍ତି।
ସେ ମାତ୍ର ୫୫ଟି ବଲ୍ରେ ୧୪୭ ରନ୍ କରି ପନ୍ତଙ୍କ ରେକର୍ଡକୁ ଭାଙ୍ଗି ଦେଇଛନ୍ତି। ସୟଦ ମୁସ୍ତାକ ଅଲୀ ଟ୍ରଫିରେ ଆୟର ମୁମ୍ବାଇ ପକ୍ଷରୁ ଖେଳୁଛନ୍ତି। ଆଜି ମୁମ୍ବାଇ ଓ ସିକ୍କିମ ମଧ୍ୟରେ ମ୍ୟାଚ୍ ହୋଇଥିଲା। ଏଥିରେ ଆୟର ଏଭଳି ରେକର୍ଡ ରନ୍ ହାସଲ କରିଛନ୍ତି।
ଆୟରଙ୍କ ଏହି ବିସ୍ଫୋରକ ବ୍ୟାଟିଂ ବଳରେ ମୁମ୍ବାଇ ନିର୍ଦ୍ଧାରିତ ୨୦ ଓଭର୍ରେ ୪ ୱିକେଟ୍ ହରାଇ ୨୫୮ ରନ୍ କରିଥିଲା। ଯଦି ଦଳ ଆଉ ୫ ରନ୍ କରି ଦେଇଥାଆନ୍ତା, ତା’ହେଲେ ଟି-୨୦ ଫର୍ମାଟରେ ସର୍ବାଧିକ ଦଳ ଗତ ସ୍କୋର କରିବାର ରେକର୍ଡ ନିଜ ନାଁରେ କରିପାରି ଥାଆନ୍ତା। ଟି-୨୦ରେ ସର୍ବାଧିକ ଦଳଗତ ସ୍କୋର ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଓ ଅଷ୍ଟ୍ରେଲିଆ ନାଁରେ ରହିଛି।