ଓଡ଼ିଶାର କୃଷି ଉତ୍ପାଦନ କ୍ଲଷ୍ଟରକୁ ସ୍କଚ୍‌ ଗଭର୍ଣ୍ଣାନ୍ସ ସ୍ୱର୍ଣ୍ଣ ପଦକ

ଭୁବନେଶ୍ୱର () ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତିକରଣ ବିଭାଗ ଅନ୍ତର୍ଗତ ଉଦ୍ୟାନକୃଷି ନିର୍ଦ୍ଦେଶାଳୟ ଅଧୀନରେ ହେଉଥିବା କୃଷି ଉତ୍ପାଦନ କ୍ଲଷ୍ଟର ପ୍ରକଳ୍ପ ଓ ଏହାର କାର୍ଯ୍ୟକାରିତାରେ ଉତ୍କର୍ଷ ନିମନ୍ତେ ୨୦୧୯ ବର୍ଷ ପାଇଁ ସ୍କଚ୍‌ ସ୍ୱର୍ଣ୍ଣ ପଦକ ପାଇଛି । ଓଡ଼ିଶା କୃଷି ଉତ୍ପାଦନ କ୍ଲଷ୍ଟରକୁ ଏହାର ଅଭିନବ ପରିକଳ୍ପନା ଯୋଗୁଁ ଏହି ପୁରସ୍କାର ପ୍ରଦାନ କରାଯାଇଛି । ନୂଆଦିଲ୍ଲୀସ୍ଥିତ ମଭଲଙ୍କର ହଲ୍‌ଠାରେ ୬୧ତମ ସ୍କଚ୍‌ ଆୱାର୍ଡ ସମାରୋହରେ ଓଡ଼ିଶାକୁ ଏହି ପୁରସ୍କାର ପ୍ରଦାନ କରାଯାଇଥିଲା । ଏଥରର ପୁରସ୍କାର ଉତ୍ତମ ପ୍ରଶାସନ ନିମନ୍ତେ ପ୍ରଦାନ କରାଯାଇଥିଲା ।

ଓଡ଼ିଶାର ଜନଜାତି ଅଧ୍ୟୁଷିତ ଅଞ୍ଚଳରେ କୃଷି ଉତ୍ପାଦନ କ୍ଳଷ୍ଟରର ସ୍ୱତନ୍ତ୍ର କାର୍ଯ୍ୟକ୍ରମ ଏହି ସମ୍ମାନଜନକ ପୁରସ୍କାର ପାଇଁ ବିବେଚିତ ହୋଇଥିଲା । ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତିକରଣ ବିଭାଗ ପକ୍ଷରୁ ଉଦ୍ୟାନ କୃଷି ନିର୍ଦ୍ଦେଶକ ଡ. ବିଜୟ କେତନ ଉପାଧ୍ୟାୟ କେନ୍ଦ୍ର ମାନବସମ୍ବଳ ମନ୍ତ୍ରୀ ଡ. ରମେଶ ପୋଖରିୟାଲ୍‌ ନିଶଙ୍କଙ୍କଠାରୁ ଏହି ପୁରସ୍କାର ଗ୍ରହଣ କରିଥିଲେ । ସୂଚନାଯୋଗ୍ୟ ଯେ ୨୦୧୮ ମସିହା ନଭେମ୍ବର ୬ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏହି ପ୍ରକଳ୍ପର ଶୁଭାରମ୍ଭ କରିଥିଲେ । ମୁଖ୍ୟମନ୍ତ୍ରୀଙ୍କ ସଫଳ ନେତୃତ୍ୱ ଓ ଲୋକାଭିମୁଖୀ କାର୍ଯ୍ୟକ୍ରମ ଫଳରେ ଓଡ଼ିଶା ମାତ୍ର ଗୋଟିଏ ବର୍ଷ ମଧ୍ୟରେ ଏହି ମର୍ଯ୍ୟାଦାଜନକ ପୁରସ୍କାର ପାଇବାରେ ସଫଳ ହୋଇଛି ।

ଜନଜାତି ବହୁଳ ଅଞ୍ଚଳଗୁଡ଼ିକରେ ଚାଷୀ ତଥା ମହିଳାମାନଙ୍କ ଆୟ ବୃଦ୍ଧି ଓ ଜୀବିକା ନିର୍ବାହ ନିମନ୍ତେ ଓଡ଼ିଶାର ୧୨ଟି ଜନଜାତିବହୁଳ ଜିଲ୍ଲାର ୪୦ଟି ବ୍ଲକ୍‌ରେ କୃଷି ଉକ୍ସଊାଦନ କ୍ଲଷ୍ଟର କାର୍ଯ୍ୟକାରୀ କରାଯାଉଛି । ଏହି ପ୍ରକଳ୍ପରେ ଏକ ଲକ୍ଷରୁ ଊଦ୍ଧ୍ୱର୍ କ୍ଷୁଦ୍ର ଓ ନାମମାତ୍ର ଚାଷୀ ଓ ମହିଳା ଚାଷୀ ଉପକୃତ ହେବେ । ଏହି ପ୍ରକଳ୍ପର ଅବଧି ୪ ବର୍ଷ ରହିଛି । ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତିକରଣ ବିଭାଗ, ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଓ ଭାରତ ରୁରାଲ୍‌ ଲାଇଭଲିହୁଡ୍‌ ଫାଉଣ୍ଡେସନ୍‌ (ବିଆର୍‌ଏଲ୍‌ଏଫ୍‌) ଏକ ‘ପ୍ରଦାନ’ ସଂସ୍ଥା ଏବଂ ୧୭ଟି ସ୍ୱେଚ୍ଛାସେବୀ ଅନୁଷ୍ଠାନର ଭାଗୀଦାରୀରେ ଏହା କାର୍ଯ୍ୟକାରୀ କରାଯାଉଛି । ଏହି ପ୍ରକଳ୍ପରେ ଉଦ୍ୟାନକୃଷି ନିର୍ଦ୍ଦେଶାଳୟ, କୃଷି ଓ ଖାଦ୍ୟ ଉତ୍ପାଦନ ନିର୍ଦ୍ଦେଶାଳୟ, ପ୍ରାଣୀ ସଂପଦ ବିକାଶ ବିଭାଗ, ଓଡ଼ିଶା ଲାଇଭିଲିହୁଡ୍‌ ମିଶନ, ଓଡ଼ିଶା ଲିଫଫ ଇରିଗେସନ୍‌ କର୍ପୋରେସନ୍‌ (ଓଏଲ୍‌ଆଇସି), ଓଡ଼ିଶା ଆର୍ଗୋ ଇଣ୍ଡଷ୍ଟି୍ରଜ୍‌ କର୍ପୋରେସନ୍‌ (ଓଏଆଇସି), ଆପିକଲ ଏବଂ ଅନ୍ୟାନ୍ୟ ସଂପୃକ୍ତ ବିଭାଗକୁ ସାମିଲ କରାଯାଇ କୃଷକମାନଙ୍କ ଜୀବିକା ନିର୍ବାହ ନିମନ୍ତେ ଭିତ୍ତିଭୂମିର ବିକାଶ କରାଯାଉଛି ।

ଏଥି ସହିତ କୃଷିକାର୍ଯ୍ୟ ପାଇଁ ଆବଶ୍ୟକ ଜଳ, ବିହନ, ସାର, କୃଷି ଯନ୍ତ୍ରପାତି ଇତ୍ୟାଦି ସାମୂହିକ ଭାବେ କ୍ଲଷ୍ଟର ଅନ୍ତର୍ଭୁକ୍ତ ଚାଷୀଙ୍କ ନିକଟରେ ସହଜରେ ପହଞ୍ଚୁଥିବା ଯୋଗୁଁ ଉତ୍ପାଦନ ବୃଦ୍ଧି ପାଉଛି । ସର୍ବୋପରି କ୍ଲଷ୍ଟର ମାଧ୍ୟମରେ ଉତ୍ପାଦିତ ଦ୍ରବ୍ୟର ସୁବିଧାରେ ଓ ଉଚିତ ମୂଲ୍ୟରେ ବିକି୍ର ହୋଇପାରୁଥିବା ପରିପ୍ରେକ୍ଷୀରେ ଚାଷୀମାନଙ୍କର ଆୟରେ ବୃଦ୍ଧି ଘଟିଛି । ଚଳିତ ବର୍ଷ ସ୍କଚ୍‌ ଆୱାର୍ଡ ନିମନ୍ତେ ସମଗ୍ର ଦେଶରୁ ୧୦୦୦ଟି ପ୍ରକଳ୍ପ ଆବେଦନ କରିଥିଲେ ଏବଂ ତନ୍ମଧ୍ୟରୁ ୬୦୦ଟି ପ୍ରକଳ୍ପକୁ ଉପସ୍ଥାପନ ନିମନ୍ତେ ଡକାଯାଇଥିଲା । ସେଥି ମଧ୍ୟରୁ ୨୦୦ଟି ପ୍ରକଳ୍ପ ସ୍କଚ୍‌ ଅର୍ଡର ଅଫ୍‌ ମେରିଟ୍‌ ଆୱାର୍ଡର ସେମିଫାଇନାଲକୁ ଉନ୍ନିତ ହୋଇଥିଲେ । ସର୍ବଶେଷରେ ଓଡ଼ିଶାର କୃଷି ଉତ୍ପାଦନ କ୍ଲଷ୍ଟରକୁ ସ୍କଚ୍‌ ଗର୍ଭର୍ଣ୍ଣାନ୍ସ ଆୱାର୍ଡ ୨୦୧୯ରେ ସ୍ୱର୍ଣ୍ଣ ପଦକ ମିଳିଛି । ଉତ୍ସବରେ ଏକ ପ୍ରଦର୍ଶନୀ ମାଧ୍ୟମରେ ଉକ୍ତ ପ୍ରକଳ୍ପର ସଫଳ ଉପସ୍ଥାପନାକୁ ସ୍କଚ୍‌ର ସଭାପତି ସମୀର କୋଚର ଭୂୟସୀ ପ୍ରଶଂସା କରିଥିଲେ ।

Share

Leave a Reply

Your email address will not be published. Required fields are marked *