ଆଜି କଂଗ୍ରେସ କାର୍ଯ୍ୟକାରିଣୀ ବୈଠକ, ଅଧ୍ୟକ୍ଷ ନିର୍ବାଚନ ଉପରେ ହୋଇପାରେ ନିଷ୍ପତ୍ତି

ନୂଆଦିଲ୍ଲୀ: ଦଳରେ ଚାଲିଥିବା ବିବାଦ ମଧ୍ୟରେ ଆଜି ସୋନିଆ ଗାନ୍ଧୀଙ୍କ ଅଧ୍ୟକ୍ଷତାରେ କଂଗ୍ରେସର କେନ୍ଦ୍ରୀୟ କାର୍ଯ୍ୟକାରିଣୀ କମିଟି (ସିଡବ୍ଲୁସି) ର ଏକ ବୈଠକ ଅନୁଷ୍ଠିତ ହେବ। ଏହି ବୈଠକରେ ଲକ୍ଷ୍ମୀପୁର ଖେରୀ, ପାଞ୍ଚଟି ରାଜ୍ୟରେ କୃଷକଙ୍କ ଆନ୍ଦୋଳନ, ଦରଦାମ୍ ବୃଦ୍ଧି ଏବଂ ବିଧାନସଭା ନିର୍ବାଚନ ତଥା ଦଳର ଆଭ୍ୟନ୍ତରୀଣ ନିର୍ବାଚନ ଉପରେ ମଧ୍ୟ ଆଲୋଚନା ହେବା ସମ୍ଭାବନା ରହିଛି। ଦଳର ଜଣେ ବରିଷ୍ଠ ନେତା କହିଛନ୍ତି ଯେ କଂଗ୍ରେସ ସଭାପତି ନିର୍ବାଚନ ପାଇଁ କାର୍ଯ୍ୟସୂଚୀ ସିଡବ୍ଲୁସି ରେ ଉପସ୍ଥାପିତ ହୋଇପାରେ।

କିଛି ନେତା ଦଳ ଛାଡିବା ଏବଂ ପଞ୍ଜାବ କଂଗ୍ରେସରେ ବିବାଦ ବଢିବା ପରେ ଦଳର ଅସନ୍ତୁଷ୍ଟ ନେତା କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ସିଡବ୍ଲୁସି ବୈଠକ ଡକାଇବାକୁ ଦାବି କରିଥିଲେ।

ଦଳର ସଭାପତି ନିର୍ବାଚନ ଦାୟିତ୍ବରେ ଥିବା ଦଳର କମିଟି ଅଧ୍ୟକ୍ଷ ମଧୁସୂଦନ ମିସ୍ତ୍ରୀ ସିଡବ୍ଲୁସିରେ ନିର୍ବାଚନ କାର୍ଯ୍ୟକ୍ରମ ଉପସ୍ଥାପନ କରିପାରନ୍ତି। ତେବେ ଅଧ୍ୟକ୍ଷ ପଦ ନିର୍ବାଚନକୁ ପାଞ୍ଚଟି ରାଜ୍ୟ ନିର୍ବାଚନ ପର୍ଯ୍ୟନ୍ତ ସ୍ଥଗିତ ରଖିବା ସମ୍ଭାବନା ମଧ୍ୟ ରହିଛି। ଏହା ସହିତ ଦଳ ସରକାରୀ ସମ୍ପତ୍ତି ବିକ୍ରୟ ଏବଂ ବେକାରୀ ସମସ୍ୟା ପାଇଁ କେନ୍ଦ୍ରକୁ ଟାର୍ଗେଟ କରି ଏକ ସଂକଳ୍ପ ପାରିତ କରିପାରେ।