ଲିମକା ବୁକ ଅଫ ରେକର୍ଡସରେ ଯୋଡ଼ାମୁଣ୍ଡ ଶିଶୁଙ୍କ ଅସ୍ତ୍ରୋପଚାର

ଭୁବନେଶ୍ବର ()  ବିଶିଷ୍ଟ ସ୍ନାୟୁଶଲ୍ୟ ବିଶେଷଜ୍ଞ ପ୍ରଫେସର ଅଶୋକ କୁମାର ମହାପାତ୍ରଙ୍କ ନେତୃତ୍ବରେ ସଫଳତାର ସହ କରାଯାଇଥିବା ବିରଳ ଯୋଡ଼ାମୁଣ୍ଡ ଅସ୍ତ୍ରୋପଚାର ଘଟଣା ଲିମ୍କା ବୁକ୍ ଅଫ୍ ରେକର୍ଡସର ୨୦୨୦ ସଂସ୍କରଣରେ ସ୍ଥାନ ପାଇଛି । ୨୦୧୭ ମସିହାରେ ନୂଆଦିଲ୍ଲୀ ଏମ୍ସଠାରେ ଏହି ଅସ୍ତ୍ରୋପଚାର ସଫଳତାର ସହ କରାଯାଇଥିଲା ।

ଓଡ଼ିଶାର ମାତ୍ର ୨୮ ମାସର ଦୁଇ ଯାଆଁଳା ଶିଶୁପୁତ୍ର ଜଗା-ବଳିଆଙ୍କ ମୁଣ୍ଡ ଖପୁରୀ ସହ ଯୋଡ଼ି ହୋଇ ରହିଥିବା ବେଳେ ୧୨୫ ଜଣ ଡାକ୍ତର ଏବଂ ଡାକ୍ତରଖାନାର ଅନ୍ୟ କର୍ମଚାରୀଙ୍କୁ ନେଇ ଗଠିତ ଏହି ଟିମ୍ ୨ ଶିଶୁଙ୍କ ଯୋଡ଼ାମୁଣ୍ଡକୁ ଅଲଗା କରିବାରେ ନିୟୋଜିତ ହୋଇଥିଲେ । ପ୍ରଫେସର ମହାପାତ୍ର ବର୍ତ୍ତମାନ ଶିକ୍ଷା ଓ ଅନୁସନ୍ଧାନ (ଡିମ୍ଡ ଟୁ ବି ଯୁନିଭର୍ସିଟି)ର ସ୍ବାସ୍ଥ୍ୟ କାର୍ଯ୍ୟକ୍ରମର ନିର୍ଦ୍ଦେଶକ ଭାବେ ଦାୟିତ୍ବ ତୁଲାଉଛନ୍ତି ।

ଏହି ଜଟିଳ ଅସ୍ତ୍ରୋପଚାର ଦୁଇଟି ପର୍ଯ୍ୟାୟରେ କରାଯାଇଥିଲା । ପ୍ରଥମ ଅସ୍ତ୍ରୋପଚାର ୨୦୧୭ ମସିହା ଅଗଷ୍ଟ ୨୮ ତାରିଖରେ କରାଯାଇଥିବା ବେଳେ ଦ୍ବିତୀୟ ଅସ୍ତ୍ରୋପଚାର ସେହିପରି ଅକ୍ଟୋବର ୨୫ ତାରିଖରେ କରାଯାଇଥିଲା । ଏହି ବିରଳ ଅସ୍ତ୍ରୋପଚାର ଭାରତର ପ୍ରଥମ ଯୋଡ଼ାମୁଣ୍ଡ (କ୍ରାନିଓପାଗସ୍) ସର୍ଜରୀ ହୋଇଥିବା ନେଇ ଲିମ୍କା ବୁକ୍ ଅଫ୍ ରେକର୍ଡସରେ ସ୍ଥାନ ପାଇଛି ।

ଅପରେସନ କରିବା ସମୟର ପ୍ରଫେସର ମହାପାତ୍ର ଦିଲ୍ଲୀ ଏମ୍ସର ନ୍ୟୁରୋସର୍ଜରୀ ବିଭାଗର ମୁଖ୍ୟ ଭାବେ ଦାୟିତ୍ବରେ ଥିଲେ । ମଙ୍ଗଳବାର ସୋଆଠାରେ ଆୟୋଜିତ ସାମ୍ବାଦିକ ସମ୍ମିଳନୀରେ ପ୍ରଫେସର ମହାପାତ୍ର କହିଛନ୍ତି ଯେ, ଏହି ଅପରେସନ୍ ଯଦିଓ ଖୁବ୍ ଜଟିଳ ଏବଂ ଆହ୍ବାନପୂର୍ଣ୍ଣ ଥିଲା ତେବେ ଏହା ଭାରତର ପ୍ରଥମ ସଫଳ ଯୋଡ଼ାମୁଣ୍ଡ (କ୍ରାନିଓପାଗସ୍) ସର୍ଜରୀ ।

ନୂଆଦିଲ୍ଲୀର ଏମ୍ସଠାରେ ଥିବା ସମସ୍ତ ଆବଶ୍ୟକୀୟ ସୁବିଧା ଏବଂ ବିଶେଷଜ୍ଞମାନଙ୍କ ଯୋଗୁଁ ଏହା ସମ୍ଭବ ହୋଇପାରିଲା ବୋଲି କହିବା ସହ ତାଙ୍କ ସହଯୋଗୀ ପ୍ରଫେସର ଦୀପକ କୁମାର ଗୁପ୍ତା ଏବଂ ଅନେକ ସଂଖ୍ୟକ ଡାକ୍ତର ଓ ଅନ୍ୟାନ୍ୟ କର୍ମଚାରୀମାନଙ୍କର କଠିନ ପରିଶ୍ରମ ଯୋଗୁଁ ଦୁଇ ଯାଆଁଳା ଶିଶୁଙ୍କୁ ଅଲଗା କରାଯାଇପାରିଲା ବୋଲି ସେ କହିଛନ୍ତି ।

ଏହି ଅପରେସନର ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ବଳିଆର ମସ୍ତିଷ୍କରେ ଏମ୍ସର ଭେନ୍ବ୍ୟାଙ୍କରୁ ଭେନ୍(ଶିରା) ଆଣି ସଂଯୋଗ କରିବା । ଏହି ଦୁଇ ଶିଶୁଙ୍କ ଯୋଡାମୁଣ୍ଡରେ ମାତ୍ର ଗୋଟିଏ ଭେନ୍ ହିଁ ରହିଥିଲା । ତେଣୁ ଏହି ପ୍ରକ୍ରିୟା ସାରା ପୃଥିବୀରେ ପ୍ରଥମ ବୋଲି ସେ କହିଛନ୍ତି ।

ଜଗା-ବଳିଆ ଯେତେବେଳେ ଏମ୍ସରେ ଭର୍ତି ହୋଇଥିଲେ, ସେବେବେଳେ ପ୍ରାଥମିକ ଆକଳନରୁ ଏହି ଦୁଇ ଶିଶୁ ଅପରେସନ ପ୍ରକ୍ରିଆକୁ ସହ୍ୟ କରିପାରିବେ କି ନାହିଁ ତାହା ଚିନ୍ତାର କାରଣ ଥିଲା । ତେବେ ୨୬ ଜୁଲାଇ ୨୦୧୭ରେ ଦୀର୍ଘ ୧୨ ଘଂଟା ଧରି ଦୁଇ ଶିଶୁଙ୍କୁ ନିଶ୍ଚେତନ କରି ସମସ୍ତ ପରୀକ୍ଷା ନିରୀକ୍ଷା କରାଯିବା ପରେ ଅପରେସନ କରାଯିବାର ନିଷ୍ପତି ନିଆଗଲା ବୋଲି ପ୍ରଫେସର ମହାପାତ୍ର କହିଛନ୍ତି ।

ଜଗା-ବଳିଆଙ୍କର ଅପରେସନ୍ କରିବା ପାଇଁ ଗଠିତ ଟିମ୍ ଆଲବର୍ଟ ଆଇନଷ୍ଟାଇନ୍ କଲେଜ ଅଫ୍ ମେଡ଼ିସିନ୍, ବ୍ରୋନକ୍ସ, ନ୍ୟୁୟର୍କର ପ୍ରଖ୍ୟାତ ଶିଶୁରୋଗ ସ୍ନାୟୁଶଲ୍ୟ ବିଶେଷଜ୍ଞ ପ୍ରଫେସର ଜେମ୍ସ ଟି ଗୁଡ୍ରିକଙ୍କଠାରୁ ପରାମର୍ଶ ନେଇଥିଲେ । କାରଣ ପ୍ରଫେସର ଗୁଡ୍ରିକ୍ ବିଶ୍ବର ଏ କ୍ଷେତ୍ରରେ ସବୁଠାରୁ ବଡ଼ ବିଶେଷଜ୍ଞ ଏବଂ ସେ ପୂର୍ବରୁ ଏଭଳି ଦୁଇଟି ଅପରେସନ ମଧ୍ୟ କରିସାରିଛନ୍ତି ବୋଲି ପ୍ରଫେସର ମହାପାତ୍ର କହିଥିଲେ ।

ଅପରସନ କରିବା ପୂର୍ବରୁ ଆମେ ଅନେକ ତଥ୍ୟ ସଂଗ୍ରହ କରିଥିଲୁ ଏବଂ ଅପରେସନ ସମ୍ପାଦନ କରିବା ପୂର୍ବରୁ ତିନୋଟି ଡ୍ରାଏ ରନ୍ ମଧ୍ୟ କରଥିଲୁ । ଆମେ ଜାଣିଥିଲୁ ହୁଏତ ୨୫ରୁ ୩୦ ପ୍ରତିଶତ ସଫଳତା ମିଳିପାରେ । କିନ୍ତୁ ଏମ୍ସର ପୂରା ଟିମ୍ ଏହି ଅପରେସନକୁ ଶତ ପ୍ରତିଶତ ସଫଳ କରିବାରେ ନିଜକୁ ନିୟୋଜିତ କରିଥିଲେ ବୋଲି ପ୍ରଫେସର ମହାପାତ୍ର କହିଛନ୍ତି । ଏଭଳି ଅସ୍ତ୍ରୋପଚାର ସଫଳତର ହାର ଖୁବ କମ୍ ରହିଥିବା ବେଳେ ଗତ ୩୩ ବର୍ଷ ମଧ୍ୟରେ ବିଶ୍ବରେ ଏଭଳି ମାତ୍ର ୧୨ରୁ ୧୩ଟି ସର୍ଜରୀ କରାଯାଇଥିବା ସେ କହିଛନ୍ତି ।

ଜଗା-ବଳିଆ ଏମ୍ସରେ ଦୁଇବର୍ଷ ରହିବା ପରେ ଓଡ଼ିଶା ଫେରିଛନ୍ତି । ଯଦିଓ ସେମାନେ ସୁସ୍ଥ ଅଛନ୍ତି ବଳିଆ ଶରୀରରେ ଉନ୍ନତି ଟିକେ ମନ୍ଥର ଗତିରେ ହେଉଛି । ତେବେ ଆମକୁ ଆହୁରି ଦୁଇ ତିନିବର୍ଷ ଅପେକ୍ଷା କରିବାକୁ ପଡ଼ିବ ବୋଲି ପ୍ରଫେସର ମହାପାତ୍ର କହିଛନ୍ତି ।

Share

Leave a Reply

Your email address will not be published. Required fields are marked *

18 − 11 =